İranın şimalında Mazandaran vilayətinin Feridonkenar su-bataqlıq ərazisində qu quşlarında yüksək patogenli “quş qripi” aşkarlanıb.
APA-nın Tehran bürosunun məlumatına görə, bunu İranın Mazandaran vilayətinin Ətraf Mühitə Nəzarət İdarəsinin direktoru Kuruş Rəbii deyib.
O bildirib ki, 5 dekabrda su-bataqlıq ərazisində ölən qu quşunun analiz nəticələri ötən gün pozitiv çıxıb. Ötən gün su-bataqlıq ərazisində daha 2 qu quşunun ölüsü tapılıb.
Direktor əlavə edib ki, bununla əlaqədar Mazandaran vilayətində istənilən çöl quşlarının ovlanması və satışı qadağan edilib.
Qeyd edək ki, İranın Mazandaran vilayəti Xəzər dənizi sahilində yerləşir.