Estoniya sentyabrın 19-dan öz sərhədlərini Rusiya vətəndaşlarına bağlayır.
APA xəbər verir ki, bu barədə Estoniya xarici işlər naziri Urmas Reinsalu bildirib.
“Bu, Estoniya və Şengen zonası üçün vacib təhlükəsizlik məsələsidir. Həm də bunun mənəvi əhəmiyyəti var: Rusiyanın Ukraynada apardığı soyqırımı müharibəsinə haqq qazandıranlara Estoniyada və Avropada yer yoxdur”, - Reinsalu vurğulayıb.
Estoniyadan əlavə Litva, Latviya və Polşa da oxşar qərarı qəbul edib.
Bu ölkələrin Xarici İşlər Nazirlərinin ortaq bəyanatında bildirilib ki, Rusiya ilə həmsərhəd olan ölkələr Rusiya vətəndaşlarının bu ölkələrin sərhədləri vasitəsilə Avropa İttifaqına və Şengen zonasına axınından narahat olurlar.
"İnanırıq ki, bu, ictimai təhlükəsizliyimiz və ümumi Şengen zonası üçün ciddi təhlükəyə çevrilir. Aİ/Şengen zonasına daxil olan Rusiya vətəndaşları arasında ölkələrimizin təhlükəsizliyinə xələl gətirmək məqsədi ilə gələnlər var, çünki Rusiya vətəndaşlarının dörddə üçü Rusiyanın Ukraynadakı işğalçılıq müharibəsini dəstəkləyir. Avropanın təhlükəsizliyini təmin etmək və Şengen zonasına daxil olan Rusiya vətəndaşlarının bizim ümumi təhlükəsizliyimizə və cəmiyyətlərimizin sabitliyinə təhlükə yaratmamasını təmin etmək üçün sərhəd mühafizə xidmətlərimizə böyük resurslar lazımdır. Ukraynada insanların işgəncələrə məruz qaldığı və öldürüldüyü zamanda təcavüzkar dövlətin vətəndaşlarının Aİ-də sərbəst gəzə bilməsi qəbuledilməzdir. Vizaların əksəriyyəti Rusiya vətəndaşlarına Rusiyanın Ukraynaya genişmiqyaslı təcavüzündən əvvəl müxtəlif geosiyasi şəraitdə verilib. Avropa İttifaqına səyahət insan hüququ deyil, imtiyazdır" - bəyanatda deyilir.
Nazirlər bildirib ki, Estoniya, Latviya, Litva və Polşa ümumi regional yanaşma haqqında razılığa gəlib. Qeyd olunub ki, turizm, mədəniyyət, idman və biznes məqsədləri üçün səyahət edən Rusiya vətəndaşları artıq bu ölkələrə səfər edə bilməyəcək.
"Ümumi yanaşmaya əsaslanan milli müvəqqəti tədbirlər hər bir ölkədə 19 sentyabr 2022-ci il tarixinədək qüvvəyə minməlidir. Tədbirlər dövlət siyasətinin və daxili təhlükəsizliyin, eləcə də ortaq Şengen zonasının ümumi təhlükəsizliyinin qorunması üçün ümumi əsaslar əsasında qəbul edilir.
Biz vurğulayırıq ki, bu, birbaşa giriş qadağası deyil və ümumi razılaşdırılmış qanuni istisnalar dissidentlər, humanitar məsələlər, ailə üzvləri, yaşayış icazəsi sahibləri, yük və nəqliyyat xidmətlərinin asanlaşdırılması, diplomatik nümayəndəliklər, Kalininqradda insanların tranzitinin asanlaşdırılması üçün qüvvədə qalacaq və s. Biz Putin rejiminin əleyhdarlarını dəstəkləməyə davam etmək və onlara Rusiyanı tərk etmək imkanlarını təmin etmək zərurətini tam dəstəkləyirik", - nazirlərin bəyanatında qeyd olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
