Daxili siyasət

Daxili siyasət

Milli Məclisdə Zeynəb Xanlarova spiker Oqtay Əsədovun ünvanına sərt ittihamlar səsləndirib

02 dekabr 2008 10:07 (UTC +04:00)

APA-nın xəbərinə görə, xalq artisti çıxışa yazılmayıb, lakin iclasa sədrlik edən I vitse-spiker Ziyafət Əsgərov çıxış növbəsi çatan deputat Qüdrət Həsənquliyevə Z. Xanlarovanın söz istədiyini bildirərək, onun danışmasına şərait yaratmasını xahiş edib.

Spiker Oqtay Əsədovun iştirak etmədiyi iclasda söz alan Zeynəb Xanlarova üzünü Milli Məclis sədrinin birinci müavini Ziyafət Əsgərova tutaraq onun spiker yerində oturmağa layiq olduğunu deyib. Z. Əsgərov buna etiraz etsə də, Z. Xanlarova bunun onun öz fikri olduğunu deyərək çıxışına davam edib və deyib ki, Ziyafət Əsgərov sənətə yüksək qiymət verən, hər şeyin yerini bilən şəxsdir: “Sənətə qiymət verən adam həmişə yaşayacaq”.

Millət vəkili Sabir Rüstəmxanlının ondan əvvəl söz alaraq Məhəmmədhüseyn Şəhriyarın Azərbaycanda abidəsinin ucaldılmamasına görə, narahat olması barədə çıxış etməsinə sevindiyini bildirən xalq artisti ona təşəkkürünü bildirib: “Başa düşmək lazımdır ki, Şəhriyar dünya şöhrətli bir insandır və tarix durduqca yaşayacaq. O cümlədən Məmməd Əmin Rəsulzadə də. Mənə bu fontanlar lazım deyil. Ac qarına fontanlara baxmaq istəmirəm. Bu gün Azərbaycanda sənətkara qiymət vermək lazımdır”.

Yenidən Z. Əsgərova xitabən “siz oğulsuz” deyən Z. Xanlarova bildirib ki, S. Rüstəmxanlının Şəhriyarın abidəsinin ucaldılması təklifini mütləq diqqət mərkəzində saxlamaq lazımdır: “Onsuz da bu qanunların hamısı hazırdır, biz bir düyməni basmaqla qanunları qəbul edirik. Mən başa düşürəm, bunlar da lazımdır. Amma bir məsələnin yeri düşüb demək istəyirəm, yoxsa ürəyimdə qalar. Ölkə prezidenti məni qəbul elədi, ən yüksək ordeni verdi. Mən 25 ildir ki, millət vəkiliyəm. Ancaq mən bura gəlmişəm, o ortada oturan adam (spiker Oqtay Əsədovu nəzərdə tutur-red.) təbrik eləmədi. Axı siz kimsiz”?

Bu zaman Z. Xanlarovanın mikrofonu söndürülüb. Z. Əsgərov Z. Xanlarovaya müraciətlə bunları deyib: “Zeynəb xanım, sizi təbrik eləmişik, hər birimizin sizə hörməti var”.
Z. Xanlarova isə yerindən çıxışına davam edib. Xalq artisti yenə spiker barəsində danışıb: “Özünü orda oturanda elə apar ki, oradan enəndə də səni saysınlar”.

Z. Xanlarovadan sonra danışan bəzi millət vəkilləri onun çıxışına münasibət bildiriblər. Siyavuş Novruzov deyib ki, şəxsi münasibətlər parlamentdə deyil, iki şəxsin arasında həllini tapmalıdır. Millət vəkili Əkrəm Abdullayev isə Milli Məclis rəhbərliyi haqqında belə danışmağın yaxşı hal olmadığını bildirib.