Tbilisidə “Ermənistan-Azərbaycan Vətəndaş Sülh Platforması”nın I Qurultayı keçirilib

Tbilisidə “Ermənistan-Azərbaycan Vətəndaş Sülh Platforması”nın I Qurultayı keçirilib
  • Clock-gray 22:45
  • calendar-gray 30 Oktyabr 2017

Ötən gün Gürcüstanın paytaxtı Tbilisi şəhərində “Ermənistan-Azərbaycan Vətəndaş Sülh Platforması”-nın I Qurultayı keçirilib.

 

APA-nın məlumatına görə, qurultayda “Ermənistan-Azərbaycan Sülh Platforması”nın əsasında “Ermənistan-Azərbaycan Vətəndaş Sülh Platforması”nın yaradılması və onun Nizamnaməsinin təsdiq olunması haqqında qərar qəbul olunub.

 

Nizamnaməyə uyğun olaraq “Ermənistan-Azərbaycan Vətəndaş Sülh Platfroması”nın İdarə Heyəti və Mərkəzi Nəzarət Təftiş Komissiyası üzvlərinin sayı, təmsilçilik prinsipi və tərkibi müəyyyənləşib. Ümumi razılaşmaya əsasən, 19 nəfərlik İdarə Heyətində üzvlərin say proporsiyası 5-i erməni, 5-i azərbaycanlı, 9-u isə ATƏT-in Minsk Qrupuna daxil olan digər ölkələrin hərəsindən 1 nəfər olmaqla müəyyən edilib.

 

Qurultay Platformanın Tbilisi, İrəvan və Bakıda ofislərinin açılması, Ermənistan və Azərbaycanda geniş ictimaiyyətlə görüşlərin keçirilməsi haqqında qərar qəbul edib. Qurultay iştirakçılarının Ermənistan və Azərbaycan prezidentlərinə, ATƏT-in Minsk qrupunun həmsədrlərinə, Roma Papası Fransiskə, Bütün Ermənilərin Katolikosu II Qareginə və Qafqaz Müsəlmanları İdarəsinin Sədri, Şeyxülislam Allahşükür Paşazadəyə Dağlıq Qarabağ probleminin sülh yolu ilə həllinə kömək məqsədilə yaradılmış Platformanın təşəbbüsünə dəstək vermələri, Ermənistanla Azərbaycan arasında davam edən 30 illik münaqişəyə son qoyulması və davamlı barışın əldə olunması üçün onlara müraciətləri qəbul olunub

 

Qurultay işini başa çatdırdıqdan sonra yeni İdarə Heyətinin ilk iclası keçirilib. İclasda “Ermənistan-Azərbaycan Vətəndaş Sülh Platforması”-nın Nizamnaməsinə uyğun olaraq həmsədrlik institutu təsis edilib, Rafael İsaxanyan və Rövşən Rzayev Platformanın İdarə Heyətinin 1 il müddətinə həmsədrləri seçilib.

apa-logo-mini

Digər xəbərlər

Arxiv

date