Mədəniyyət siyasəti

Ana səhifə

Mədəniyyət siyasəti

Almaniyada Azərbaycanın maddi-mədəniyyət nümunələrindən ibarət sərgi təşkil olunacaq

20 avqust 2008 14:34 (UTC +04:00)

Bakı. Ülkər Qasımova - APA. Bu ilin avqustundan noyabrınadək Almaniyada Azərbaycan İli çərçivəsində Berlin Etnologiya Muzeyində, noyabrdan 2009-cu ilin martınadək isə Drezden Etnologiya Muzeyində Azərbaycanın maddi-mədəniyyət nümunələrindən ibarət sərgi təşkil olunacaq. Mədəniyyət və Turizm Nazirliyinin mətbuat katibi Zöhrə Əliyeva APA-ya deyib ki, sərgidə Dövlət İncəsənət Muzeyi, Azərbaycan Xalçası və Xalq Tətbiqi Sənəti Dövlət Muzeyi, Dövlət Teatr Muzeyi, Musiqi Mədəniyyəti Dövlət Muzeyi, Azərbaycan İstiqlal Muzeyi, “Şirvanşahlar Sarayı-kompleksi” Dövlət Tarix-Memarlıq Qoruq-Muzeyi, Zaqatala Tarix-Diyarşünaslıq Muzeyi, Mingəçevir şəhərinin tarixi muzeylərindən eksponatlar nümayiş etdiriləcək.

Sərgidə Azərbaycanda aparılmış arxeoloji qazıntılar zamanı tapılmış və əvəzsiz tarixi-mədəni dəyər kəsb edən eksponatlar, eramızın XIII əsrinə aid edilən müxtəlif ölçülü daş kitabələr, UNESCO-nun “Bəşəriyyətin şifahi və qeyri-maddi irsinin şah əsərləri” siyahısına daxil edilən muğam sənətinin əsas alətləri – tar, kaman, qaval, habelə zurna, ney, qoşanağara kimi xalq musiqi alətləri də göstəriləcək. “Azərbaycan – Odlar Yurdu” adı altında keçiriləcək sərgidə qədim əlyazmalar, miniatür, dekorativ tətbiqi və təsviri sənət əsərlərlə yanaşı klassik Azərbaycan poeziyasının korifeylərinin də əsərləri nümayiş olunacaq.

Sərginin açılış mərasimi avqustun 26-da Berlin Etnologiya Muzeyində olacaq. Bu günlərdə isə Mədəniyyət və Turizm Nazirliyinin nümayəndə heyəti sərgidə iştirak etmək üçün Berlinə yola düşəcək.

Azərbaycan_Almaniya_sərgi