"Minsk-2019-un Əməliyyat Komitəsinin sədri Georgi Katulin ilə danışıqlardan sonra birgə hazırlıq işlərinə başladıq, gələcək strategiyanı və planlamanı hazırladıq. İlk gündən bütün departamentlər üzrə ekspert konsultant kimi çalışıram".
APA-nın məlumatına görə, bunu Belarusun paytaxtı Minskdə keçirilən II Avropa Oyunlarına ezam olunmuş azərbaycanlı jurnalistlərə yarışın Əməliyyat Komitəsinin əməliyyatlar üzrə məsləhətçisi Samir Məmmədov deyib.
Minsk-2019-un təşkilatı işləri ilə bağlı ilk gündən komandada olan həmyerlimiz bildirib ki, onun II Avropa Oyunlarına dəvət almasında Bakı-2015-də təcrübəsi əsas götürülüb. Belarus dövləti onunla yanaşı, bir neçə azərbaycanlını analoji yarışda həyata keçirdikləri uğurlu layihələrin Minskdə tətbiqi üçün dəvət edib və birgə işlər həyata keçirilib.
S. Məmmədov Bakı-2015-dən sonra Azərbaycanda keçirilən IV İslam Həmrəyliyi Oyunlarında da çalışıb və yarış başa çatan kimi dərhal II Avropa Oyunlarının təşkilati işləri üçün Belarusdan dəvət alıb: "Mən gələndən sonra Azərbaycandan da mütəxəssislər dəvət etdim. Çox qürur hissi ilə deyə bilərəm ki, iki il ərzində çəkdiyimiz əziyyətin bəhrəsini bu gün görürük".
O, Bakıda keçirilən ilk Avropa Oyunlarında qazandığı təcrübənin əhəmiyyətini xüsusi vurğulayıb: “Bakı-2015-də Azərbaycan Prezidenti İlham Əliyev, I vitse-prezident Mehriban xanım Əliyeva intensiv olaraq problemlərlə maraqlanırdılar, işçi heyəti ilə görüşürdülər. Bu isə bizdə böyük ruh yüksəkliyi yaradırdı. Bu onun nəticəsidir ki, bu gün biz xarici ölkədə müxtəlif vəzifələrdə mütəxəssis kimi çalışırıq”.
Onun sözlərinə görə, Minskdə Avropa Olimpiya Komitələrinin ekspertləri ilə hər görüşlərində ilk Avropa Oyunlarının yüksək təşkilatçılığından söz açıblar. Hazırda II Avropa Oyunlarının Əməliyyat Komitəsində bir neçə azərbaycanlı mütəxəssisin çalışdığını da deyən S.Məmmədov Minskdə olduqları dönəmdə onlara dəstək olan gənclər və idman naziri Azad Rəhimova, birinci Avropa Oyunlarının Əməliyyat Komitəsinin Kooperativ direktoru Elçin Səfərova, azərbaycanlı və xarici həmkarlarına xüsusi təşəkkürünü bildirib: “Nəzərə alınsa ki, Avropa Oyunlarının bünövrəsi məhz Azərbaycanda qoyulub, deməli, yazılmış qanunlar və strategiya var. Amma Minsk də bu oyunlara özünəməxsusluğunu qata bilib. Məhz bir sıra məlumatların əldə olunmasında, istiqamətlərin müəyyənləşməsində onlardan aldığım informasiyalar əsasında yaranan və yarana biləcək təşkilati problemləri vaxtında aradan qaldırırıq, sağ olsunlar öz köməkliklərini əsirgəməyiblər”.
S.Məmmədov bildirib ki, II Avropa Oyunları başa çatan kimi Bakıya qayıdıb, XV Avropa Gənclərin Yay Olimpiya Festivalının təşkili işində çalışacaq: “Bununla bağlı dəvət almışam və yenidən Vətəndə çalışacağım üçün qürur hissi keçirirəm. Artıq Azərbaycanın Avropa, Olimpiya Oyunlarının təşkilati işlərində çalışan peşəkar mütəxəssisləri yetişib”.
Qeyd edək ki, II Avropa Oyunları iyunun 30-da yekunlaşacaq. Avropa Gənclərin Yay Olimpiya Festivalı isə iyulun 21-27-də keçiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
