Bu ilin yanvar ayında Rusiyanın "Qazprom" şirkəti uzaq xarici ölkələrə 19,4 mlrd. kubmetr qaz tədarük edib ki, bu da ötən ilin müvafiq dövrü ilə müqayisədə 6,1 mlrd. kubmetr və ya 45,4% çoxdur.
"APA-Economics"in məlumatına görə, bu barədə Rusiya mətbuatı "Qazprom"a istinadən xəbər verir.
Məlumata görə, qaz alışı xüsusən Almaniya (32,4%), İtaliya (221,5%), Türkiyə (20,8%), Fransa (77,3%), Niderland (21,2%) və Polşa (89,9%) kimi iri Rusiya "mavi yanacağı"nın istehlakçıları tərəfindən artırılıb.
Qeyd edək ki, Azərbaycan Türkiyənin qaz idxalında Rusiyadan sonra ikinci yerdə qərarlaşıb. Bununla yanaşı, Azərbaycan 2020-ci ilin dekabrın 31-dən Trans-Adriatik boru kəməri vasitəsi ilə Avropaya qazın ixracına başlayıb. Bu boru kəməri Yunanıstan, Albaniya və Adriatik dənizindən keçməklə İtaliyanın cənubuna qədər uzanır.