Bu gün Ailə, Qadın və Uşaq Problemləri üzrə Dövlət Komitəsinin əməkdaşları valideyni olmadan evdə nəzarətsiz qalan azyaşlıya dəstək olmaq arzusunu bildirən qonşu – İlyas Əfəndiyev adına Elitar Gimnaziyanın müəlliməsi Elnarə İbrahimova ilə görüşüb.
Bu barədə APA-ya Dövlət Komitəsindən xəbər verilib. Qeyd edilib ki, E.İbrahimovanın həssas yanaşmasının hər bir vətəndaş üçün örnək davranış nümunəsi olduğu qeyd edilib və təşəkkürnamə təqdim edilib.
Dövlət Komitəsi bildirib ki, azyaşlının məktəbəqədər təhsilə cəlb edilməsi, alimentin ödənilməsi ilə bağlı müvafiq tədbirlər görür.
***
11:12
Ailə, Qadın və Uşaq Problemləri üzrə Dövlət Komitəsi anası tərəfindən evdə tək buraxılan azyaşlı ilə bağlı məlumat yayıb.
Dövlət Komitəsindən APA-ya verilən xəbərdə bildirilib ki, fevralın 3-də kütləvi informasiya vasitələrində evdə tək qalan azyaşlı uşağın yaşadıqları Yasamal rayonu, Ə. Əhmədov küçəsində yerləşən binanın mənzillərinin birində eyvana çıxaraq təhlükəli vəziyyətdə olması ilə bağlı videogörüntü öz əksini tapıb.
Qeyd olunub ki, məsələnin araşdırılması ilə əlaqədar dərhal Ailə, Qadın və Uşaq Problemləri üzrə Dövlət Komitəsinin Uşaq problemləri şöbəsinin əməkdaşları, Yasamal rayon İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyanın nümayəndəsi və Daxili İşlər Nazirliyinin Yasamal rayonu üzrə Polis şöbəsinin Yetkinlik yaşına çatmayanların işləri üzrə inspektoru yuxarıda qeyd edilən ünvanda yerləşən ailəyə səfər həyata keçiriblər:
"6 yaşlı uşağın anası A.Ə həyat yoldaşından ayrıldığını, evin yaxınlığında yerləşən şirniyyat müəssisəsində işlədiyini və uşağı evdə nəzarətsiz şəkildə tək qoyaraq işə getdiyini bildirib. Azyaşlı ilə söhbət zamanı məlum olub ki, gün ərzində anası işə getdiyi üçün onu evdə tək qoyur və uşaq qorxduğu üçün eyvana çıxaraq anasını çağırır.
Komitə əməkdaşları anaya valideynlik məsuliyyəti barədə ilkin olaraq xəbərdarlıq edərək, bir daha bu halın baş verdiyi təqdirdə valideynlik hüququ ilə bağlı qanunvericiliyə uyğun tədbirlərin görüləcəyini bildiriblər.
Ailə nəzarətə götürülüb və problemlərinin həlli istiqamətində müvafiq tədbirlərin görülməsi nəzərdə tutulur", - xəbərdə bildirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
