Əcnəbilər üçün çoxdəfəlik giriş vizalarının rüsumunun müəyyənləşdirilməsinə dair yeni qayda qüvvəyə minib

Əcnəbilər üçün çoxdəfəlik giriş vizalarının rüsumunun müəyyənləşdirilməsinə dair yeni qayda qüvvəyə minib
  • Clock-gray 12:28
  • calendar-gray 21 Oktyabr 2019

Xarici İşlər Nazirliyi “Azərbaycan Respublikasına səfər etmək istəyən əcnəbilərə və vətəndaşlığı olmayan şəxslərə vizaların verilməsi üçün müraciətin və sənədlərin qəbulu üzrə inzibati reqlament”ə dəyişiklik edib.

APA-nın məlumatına görə, bu reqlamentə əsasən, təqdim edilən elektron xidmət (http://eapplication.mfa.gov.az) Azərbaycan Respublikasına səfər etmək istəyən əcnəbilərin və vətəndaşlığı olmayan şəxslərin viza (elektron viza istisna olmaqla) almaq üçün elektron qaydada müraciətinin və sənədlərinin qəbul edilməsi, baxılması, cavablandırılması və baxılmanın nəticəsindən asılı olaraq viza rəsmiləşdirilməsi və ya viza rəsmiləşdirilməsindən imtina edilməsini əhatə edir.

Viza verilməsi haqqında əcnəbilərin və vətəndaşlığı olmayan şəxslərin vəsatətlərinə, müraciət olunduğu gündən ən geci 15 gün keçənədək, Azərbaycan Respublikasının Prezidenti tərəfindən müəyyən edilən hallarda, habelə, əcnəbilərin və vətəndaşlığı olmayan şəxslərin səfəri təcili müalicə, yaxud Azərbaycan Respublikasında yaşayan yaxın qohumunun ağır xəstəliyi və ya ölümü ilə bağlıdırsa (bu faktları təsdiq edən sənəd təqdim olunmaqla) ən geci 2 iş günü ərzində baxılır. “Dövlət rüsumu haqqında” qanunun 16.1.6-cı və 16.1.7-ci maddələrinə müvafiq olaraq, tranzit vizaları və birdəfəlik giriş vizaları üçün – 20 ABŞ dolları, çoxdəfəlik giriş vizaları üçün – 350 ABŞ dolları məbləğində dövlət rüsumu ödənilir.

Dəyişikliyə əsasən isə artıq xarici ölkələrin müvafiq orqanları tərəfindən Azərbaycan Respublikasının vətəndaşlarına münasibətdə çoxdəfəlik giriş vizalarının rəsmiləşdirilməsi üçün tutulan rüsumun məbləği “Dövlət rüsumu haqqında” qanunla eyni hərəkətlərə görə müəyyən edilmiş məbləğdən fərqli olduqda, dövlət rüsumunun dərəcəsi Nazirlər Kabinetinin qərarı ilə həmin ölkələrdə Azərbaycan Respublikasının vətəndaşlarına münasibətdə tutulan rüsum səviyyəsində müəyyən oluna bilər.

Dəyişiklik oktyabrın 18-dən qüvvəyə minib.

Qeyd edək ki, bu müddəa “Dövlət rüsumu haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2019-cu il 13 iyun tarixli qanununda əksini tapıb. Qanun Azərbaycan Respublikası Prezidentinin 2019-cu il 31 iyul tarixli fərmanı qanun qüvvəyə minib. Fərmana əsasən, mərkəzi icra hakimiyyəti orqanları normativ hüquqi aktları bu qanuna uyğunlaşdırmalı idi. Xarici İşlər Nazirliyidə icraçı orqan kimi “Azərbaycan Respublikasına səfər etmək istəyən əcnəbilərə və vətəndaşlığı olmayan şəxslərə vizaların verilməsi üçün müraciətin və sənədlərin qəbulu üzrə inzibati reqlament”də müvafiq dəyişiklik edib və qayda qüvvəyə minib.

 

Ramiz Mikayıloğlu

Digər xəbərlər

Arxiv

date