“Mədəniyyət naminə sülh” qlobal kampaniyası çərçivəsində onlayn görüş keçirilib

“Mədəniyyət naminə sülh” qlobal kampaniyası çərçivəsində onlayn görüş keçirilib
# 17 iyul 2021 17:36 (UTC +04:00)

“Mədəniyyət naminə sülh” (Peace4Culture) qlobal kampaniyası çərçivəsində onlayn görüş keçirilib.

Bu barədə APA-ya Mədəniyyət Nazirliyindən məlumat verilib.

Bildirilib ki, görüşdə Mədəniyyət Nazirliyinin Aparat rəhbəri Vasif Eyvazzadə, Böyük Britaniyanın Koventri Universitetində Sülh, Etimad və Sosial Münasibətlər İnstitutunun qurucusu və rəhbəri professor Mayk Hardi, Avstraliyanın Mədəni İnfuziya və Müxtəliflik Atlasının təsisçisi Peter Musaferaidis, HOPE təşkilatının qurucusu Xavyer Qonzalez, həmçinin digər şəxslər iştirak edib.

Görüşdə V. Eyvazzadə “Mədəniyyət naminə sülh” qlobal kampaniyasının əsas hədəfləri, “Bakı Prosesi”, Bakı Beynəlxalq Humanitar Forumu, Ümumdünya Mədəniyyətlərarası Qlobal Forumu mövzusunda danışdı. Qeyd etdi ki, Azərbaycan tərəfinin məqsədi regionda sülh və təhlükəsizliyin möhkəmləndirilməsi, xalqlar və mədəniyyətlər arasında uğurlu dialoq və etimadın qurulması, birgə yaşamaq və bir-birinə hörmət mədəniyyətini daha da inkişaf etdirərək, milli və beynəlxalq səviyyəli davamlı tərəqqiyə nail olmaqdan ibarətdir.

Azərbaycanın 44 günlük Vətən müharibəsi nəticəsində işğaldan azad edilən torpaqlara geri dönəcək məcburi köçkünlərin yeni həyat şəraitinə uyğunlaşması, mədəniyyət və yaradıcılıq qabiliyyətlərinin artırılması, yaradıcı peşə və layihələrin inkişaf etdirilməsi yolunda fəaliyyət davam etdiriləcək.

Daha sonra HOPE  təşkilatının rəhbəri təşkilatın missiya və vəzifələri barədə təqdimat etdi.  

X. Qonzalez miqrant və qaçqınların təhsil, peşə vərdişlərinin formalaşdırılması haqda bir sıra vacib məsələlərdən və layihələrdən  bəhs etdi.

Eyni zamanda Maykl Valmsley dini, mədəni və irsi müxtəliflik sahəsində qlobal məsələləri özündə birləşdirən qlobal müxtəliflik atlasının istiqamətləri barədə ətraflı məlumat verdi.

Professor Mayk Hardi son 8 ildə Azərbaycan tərəfin məsləhətçisi olduğunu vurğuladı. “Mədəniyyət naminə sülh” qlobal kampaniyasının, “Bakı Prosesi” eyni zamanda yuxarıda sadalanan bütün mühüm layihələrin uğurla davam etdiriləcəyini bildirdi.

Görüşün sonunda müzakirə olunan təşəbbüs və layihələr barədə razılığa  gəlinməsi haqda fəaliyyət planının istiqaməti müəyyən edildi. 

#
#

ƏMƏLİYYAT İCRA OLUNUR