Bakı – APA. Azərbaycan millisinin III İslam Həmrəyliyi Oyunlarında qazandığı medalların sayı 18-ə çatıb. Apasport.az saytının məlumatına görə, yığmamızın qazandığı son 4 mükafatdan ikisinin əyarı qızıl, biri gümüş, digəri bürünc olub.
Belə ki, atletimiz Hayle İbrahimov 5000 m məsafəyə qaçışda finiş xəttinə 1-ci çataraq, fəxri kürsünün ən yüksək pilləsinə qalxıb. Onun uğurunu 3 təkanla tullanan Yekaterina Sarıyeva da təkrarlayıb.
Bakı-2015-də iştirak məqsədi ilə yaradılan kamandan oxatma komandamız da İndoneziyada özünü doğruldub. Roman Venqerov, Aleksey Korpin və Zaur Qəhrəmanovdan ibarət millimiz ölkəmizin aktivinə gümüş medal yazdırıb.
5000 m məsafəyə qaçışda Layeş Abdullayeva isə bürünc medalla kifayətlənib.
Qeyd edək ki, onlardan öncə komandamıza digər mükafatları Rafael Ağayev (75 kq), Ayxan Mamayev (84 kq), karate komandamız, Boris Kirillov (hamısı çempion), Niyazi Əliyev (67 kq), Şahin Atamov (+84 kq), Əfqan Bayramov (77 kq), Silviya Angelova (48 kq), İntiqam Zairov (94 kq, hamısı gümüş medal), Dmitri Marşin, Zülfüqar Süleymanov (62 kq) və Namiq Cəlilov (85 kq, hər üçü bürünc medal) qazandırıb. Yevgeni Lazuka isə 1 gümüş və 1 bürünc medala yiyələnib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
