Hadisə

Ana səhifə

Hadisə

Azərbaycanda əməliyyat zamanı polisə silahlı müqavimət göstərilib, iki polis zabiti xəsarət alıb

14 sentyabr 2012 07:58 (UTC +04:00)

Bu barədə APA-ya Binəqədi rayon Polis İdarəsindən bildirilib.

Hadisə ötən gecə baş verib. Beş nəfərdən ibarət dəstə Bakının Yasamal rayonunda taksi sürücüsünün avtomobilini qaçırıb. Polis Binəqədi rayonu ərazisində onların izinə düşüb. Dəstə üzvlərindən 4-ü hadisə yerindən qaçmağa nail olsa da, onlardan biri, 1991-ci il təvəllüdlü Nahid Abdullayev Binəqədi rayon Polis İdarəsinin əməkdaşları tərəfindən saxlanılıb. O, tutulan zaman üzərində gəzdirdiyi bıçaqla polis əməkdaşlarına müqavimət göstərib. Polis kapitanı Kamran Bayramov və baş leytenant Ramil Əliyev yüngül xəsarət alıb. Sonda polis N. Abdullayevi zərərsizləşdirə bilib və o həbs edilib.

Hazırda quldurluq cinayətini törətməkdə təqsirli bilinən digər dəstə üzvlərinin tapılması istiqamətində əməliyyat tədbirləri davam etdirilir.

Qeyd edək ki, bu, son həftə ərzində Bakıda polisə qarşı törədilən ikinci cinayət hadisəsidir. Belə ki, bir neçə gün əvvəl sərxoş vəziyyətdə olan naməlum şəxs əlində bıçaqla Binəqədi Rayon Polis İdarəsinin 5-ci Polis Bölməsinə gələrək növbədə olan polis əməkdaşlarını hədələyib. Sərxoş şəxs onun əlindən bıçağı almaq istəyən iki polis əməkdaşına xəsarət yetirib. Nəticədə polis zabitləri Seyfəddin Ağayev və Tural İbrahimov xəsarət alıb. Sonda sərxoş şəxs zərərsizləşdirilib və həbs edilib.

Araşdırmalar zamanı polisə hücum edən şəxsin Bakı şəhər sakini, 1976-cı il təvəllüdlü Zaur Ələkbər oğlu Məmmədov olduğu müəyyənləşib. O, xalası oğlunun həbsinə etiraz olaraq bu addımı atdığını bildirib.

Faktla bağlı Binəqədi Rayon Prokurorluğu tərəfindən cinayət işi başlanıb, istintaq gedir.

polis