Bakı. Şəhriyar Əlizadə - APA. Bu gün Bakı Ağır Cinayətlər Məhkəməsində iş adamını öldürməkdə və digər cinayətlərdə təqsirləndirilən dəstə üzvlərinin cinayət işi üzrə məhkəmə prosesi davam etdirilib.
APA-nın məlumatına görə, hakim Zeynal Ağayevin sədrlik etdiyi iclasda zərərçəkmiş qismində Abı Həsənov ifadə verib. A. Həsənov qeyd edib ki, dəstə üzvləri mənzilinə girmək istəyiblər. Lakin o bu zaman həyətə çıxaraq atəş açıb. Bu zaman təqsirləndirilən şəxslər qaçıblar. Abı Həsənov onlara ən ağır cəzanın verilməsini istəyib.
Daha sonra prosesdə şahid qismində Hacıbəy Hacıbəyov Maşallah Hüseynov və digərləri ifadə veriblər. Məhkəmə prosesi fevralın 22 də davam etdiriləcək
Qeyd edək ki, DİN-in yaydığı məlumata görə, 2014-cü il noyabrın 24-də Qəbələ şəhər sakini iş adamı Vahid Vahabovun yaşadığı evdə meyiti tapılıb. Araşdırmalarla müəyyən edilib ki, Vahid Vahabovun qonşusu Coşqun Kərimbəyli onun imkanlı şəxs olduğu barədə yaxın dostları, radikal ekstremist yönümlü dini təriqət üzvləri olan əvvəllər məhkum edilən Nurəddin Xəlilov, Müşfıq Mikayılov, Rəşad Həşimli və Əhməd Kərimova məlumat verib. Onlar Vahid Vahabovun yaşadığı evə basqın edərək külli miqdarda pul və qızıl- zinət əşyaları ələ keçirmək barədə qabaqcadan razılığa gəliblər. Dəstə üzvləri oğurladıqları avtomobillə Qəbələ şəhərinə gedib üzlərinə maska taxaraq Vahid Vahabovun yaşadığı mənzilə girib, odlu silahla onu öldürüb, həyat yoldaşına müxtəlif dərəcəli xəsarətlər yetiriblər.
Aparılan əməliyyat-axtarış tədbirləri nəticəsində Nurəddin Xəlilov, Müşfıq Mikayılov, Zaur Əliyev və Pərviz Şıxəliyev həbs olunublar. Saxlanılarkən onlardan silah-sursat götürülüb.
İstintaq hərəkətləri nəticəsində dəstə üzvlərinin bir neçə şəxsin evinə quldurluq yolu ilə basqın etdikləri də məlum olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
