Azərbaycan Avtomobil Yolları Dövlət Agentliyi tərəfindən regionların sosial-iqtisadi inkişafı dövlət proqramına uyğun olaraq bu il reallaşdırılan 63 kənd və qəsəbələrarası yolların yenidən qurulması layihələri çərçivəsində Ağdaş rayonunda daha bir avtomobil yolu əsaslı şəkildə bərpa olunur.
Agentlikdən "APA-Economics"ə verilən məlumata görə, uzunluğu 27 kilometr olan Ağdaş rayonu Nehrəxəlil-Kotanarx-Cardam-Tofiqi-Şəmsabad avtomobil yolu 2 hərəkət zolaqlı olmaqla IV texniki dərəcəyə uyğun yenidən qurulur. Burda yolun hərəkət hissəsi 6 metr, çiyinlər isə 2 metr olmaqla yol yatağının eni 10 metr təşkil edir.
"Sözügedən yolun neçə ildən sonra əsaslı şəkildə və sürətlə bərpa olunması yol boyu 7 yaşayış məntəqəsinin 13 minə yaxın əhalisinin ürəyincə olub. Çünki yol istismar üçün artıq yararsız vəziyyətə düşmüşdü. Bu isə gediş-gəlişdə problemlər yaradırdı", - deyə məlumatda vurğulanıb.
Hazırda yol boyu deformasiyaya uğramış hissələr qazılara çıxarılır, əvəzinə yararlı material tökülərək kipləşdirmə işləri aparılır və yeni yol yatağı inşa edilir. Bu işlərin həcmi 75 min kubmetr təşkil edir. Texnoloji ardıcıllığa uyğun olaraq növbəti mərhələdə 227 min kvadratmetr sahədə normativ qalınlıqlarda karxana çınqılı və optimal qum-çınqıl qarışıqlarından istifadə olunmaqla yol əsasının inşası işləri aparılacaq. Layihədə daha sonra isə asfaltlanma işlərinə başlanılması və paralel olaraq yol çiyinlərinin bərkidilməsi işləri də nəzərdə tutulub.
Avtomobil yolu üzərində yerləşən süni qurğu və borulara gəldikdə isə, mövcud avtomobil körpülərinin təmiri, körpü üzərində istismara yararsız 102 paqon-metr körpü məhəccərlərinin yeniləri ilə əvəz olunması, həmçinin uzun illər istismar olunduğundan sukeçiricilik qabiliyyəti aşağı düşmüş və istismar üçün yararsız vəziyyətə düşmüş boruların yeniləri ilə əvəz olunması və zəruri nöqtələrdə yenilərinin quraşdırılması nəzərdə tutulan işlərdəndir. Bu çərçivədə 620 paqon-metr uzunluğa malik müxtəlif diametrli suötürücü dəmir-beton boruların quraşdırılması işləri aparılacaq.
"Texnoloji ardıcıllığa uyğun olaraq tikinti işlərinin sonuncu mərhələsində 259 ədəd yol nişanı və məlumatverici lövhənin, 340 ədəd siqnal dirəyinin quraşdırılması, 79 km uzunluğunda üfüqi nişanlanma xətlərinin çəkilməsi ilə tam yeni və müasir yol infrastrukturunun yaradılmasından sonra yol boyu yaşayan vətəndaşların istər M4 Bakı-Şamaxı-Yevlax magistral avtomobil yoluna, istərsə də respublika əhəmiyyətli Ağdaş-Ləki avtomobil yoluna, ordan da M2 Bakı-Ələt-Qazax-Gürcüstan Respublikası ilə dövlət sərhədi avtomobil yoluna rahat çıxış əldə etməklə, onların rayon mərkəzi və qonşu rayonlar da daxil respublikanın istənilən istiqamətinə rahat gediş-gəlişi təmin olunacaq. Ən əsası yol boyu yetişdirilən məhsullar tez və xarab olmadan istehlakçıya çatdırılmaqla vətəndaşların sosial rifah halı yüksələcək", - deyə məlumatda vurğulanıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
