“APA-Economics”in məlumatına görə, bunu SOCAR-ın Sərmayələr İdarəsinin direktoru Vaqif Əliyev bildirib.
Onun sözlərinə görə, Yunanıstan tərəfinin imzalanan müqaviləyə yenidən baxılmasına və SOCAR-ın payının 49%-ə endirilməsi kimi təkliflərinə baxmayaraq, Azərbaycan tərəfinin bu məsələdə mövqeyi dəyişməyib: “SOCAR DESFA-da sahib olduğu 66% səhmi satmaq və ya azaltmaq niyyətində deyil”.
Xatırladaq ki, DESFA-nın SOCAR tərəfindən özəlləşdirilməsi məsələsinə Avropa Komissiyasının Rəqabət üzrə Baş Direktorluğunda baxılır.
2013-cü il iyulun 31-də Yunanıstanın Dövlət Əmlakının İdarə Edilməsi Fondu (Hellenic Republic Asset Development Fund, HRADF) DESFA qazpaylayıcı şirkətinin 66%-lik səhm paketinin SOCAR tərəfindən 400 mln. avroya alınmasına dair sövdələşməni təqdir edib.
2013-cü ilin dekabr ayında SOCAR ilə Yunanıstanın Dövlət Özəlləşdirmə Fondu və “Petroleum” şirkəti arasında “Səhmlərin Alqı-Satqı Müqaviləsi” və “Səhmdarlar haqqında Müqavilə” imzalanıb.
SOCAR DESFA-nın səhmlərinin 31%-ni Yunanıstan hökumətindən, 35%-ni “Hellenic Petroleum SA” şirkətindən alır. DESFA üzərində nəzarətin SOCAR şirkətinə verilməsinə qədər Yunanıstan şirkətinin səhmlər paketinə HRADF tərəfindən nəzarət edilir.