Bakı. Vüsal Nəbiyev – APA-Economics. Yaxın günlərdə Mingəçevir-Bəhrəmtəpə avtomobil yolunun yenidən qurulması layihəsinin I hissəsinin (Mingəçevir şəhəri - Mingəçevir dəmir yolu stansiyası arasında olan 16,480 kilometrlik hissəsi) tikintisi işlərinə start veriləcək.
Nəqliyyat Nazirliyi “Azəryolservis” ASC-dən “APA-Economics”ə verilən məlumata görə, II dərəcəli avtomobil yolunun ümumi eni 15 metr olmaqla iki hərəkət zolağından ibarətdir. Layihəyə əsasən, hər bir hərəkət zolağının eni 3,75 metrdir. Yolun kənarlarında 0,75 metr asfalt örtüklü və 3,0 metr ikiqat bituma hopdurulmuş əsasın alt layı materialından olmaqla çiyinlərin eni 3,75 metr olması nəzərdə tutulub.
Yolun qalınlığı 72 santimetr olacaq. Bura 30 sm əsasın alt layı, 15 sm əsasən qırmadaş layı, 14 sm örtüyün üst layı, 8 sm əlaqələndirici lay və 5 sm aşınma layı daxildir. Yol üzərində yerləşən bir körpü sökülərək yerində yenisi inşa ediləcək. Kürəkçay üzərindəki körpü 1 aşırımlı və 18 metr uzunluğunda olacaq.
Yenidənqurma işləri çərçivəsində Mingəçevir-Bəhrəmtəpə avtomobil yolunun Mingəçevir şəhəri - Mingəçevir dəmir yolu stansiyası arasında olan hissəsində 26 ədəd dairəvi borunun, 1 ədəd alt keçidin və 7 ədəd düzbucaqlı su keçidinin tikintisi də aparılacaq.
Qeyd edək ki, uzunluğu 154 kilometr olan Mingəçevir - Bəhrəmtəpə avtomobil yolunun yenidənqurulması layihəsi üç hissədən ibarətdir və digər iki hissənin tikintisi ilə bağlı tender hələlik elan edilməyib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
