APA-nın xəbərinə görə, layihə çərçivəsində Kyung Hee Universitetinin SEBA-nın nəzdindəki Koreya Şərq Təbabəti Klinikasının əməkdaşları, koreyalı həkim-professorlar və fizioterapevtlər tərəfindən iki gün ərzində 260 nəfər məcburi köçkünə könüllü tibbi xidmət göstərilib.
Osteoxondroz, iflic, artrit, revmatizm, əzələ ağrıları və digər xəstəliklərdən əziyyət çəkən insanların müayinəsi ilə bərabər, hər bir pasiyentə dərman bağlamaları da paylanılıb.
Layihə Qaçqınların və Məcburi Köçkünlərin İşləri üzrə Dövlət Komitəsi və Füzuli Rayon İcra Hakimiyyətinin dəstəyi ilə reallaşıb.
Səfər çərçivəsində Koreyanın Azərbaycandakı səfiri Çoi Suk-İn və SEBA-nın sədri Ruhəngiz Heydərova Füzuli Rayon İcra Hakimiyyətinin başçısı Alı Alıyevlə görüşüb, məcburi köçkünlərin məskunlaşdığı “Zobucuq 2” qəsəbəsində olublar. Bir məcburi köçkün ailəsinə səfirlik və SEBA tərəfindən məişət texnikaları hədiyyə edilib.
Layihə çərçivəsində Horadiz şəhər 3 nömrəli tam orta məktəbində 3-5-ci sinif şagirdləri arasında “Sehrli nağıl” rəsm müsabiqəsi təşkil olunub. Şagirdlər Azərbaycan nağılı “Göyçək Fatma” və Koreya nağılı "Şim Çonqun hekayəsi" haqqında təsəvvürlərini rəsmlərdə təsvir ediblər.
Tədbirdə çıxış edən Füzuli Rayon İcra Hakimiyyətinin başçısı Alı Alıyev və məktəbin direktoru Vüsalə Qəhrəmanova layihəni Koreya-Azərbaycan dostluq münasibətlərinin göstəricisi olduğunu qeyd edərək, cəbhə bölgəsində yaşayan füzulililəri yaddan çıxarmadıqları üçün Koreyanın Azərbaycandakı səfirliyinə və SEBA-ya təşəkkürlərini bildiriblər.
Səfir çıxışında qeyd edib ki, “Sabaha sağlam ruhla” layihəsi Koreya-Azərbaycan arasında qarşılıqlı anlaşma və inam əsasında dostluq əlaqələrinin daha da möhkəmləndirilməsi məqsədi daşıyır. Azərbaycan və Koreya bir-birindən uzaq məsafədə yerləşsələr də, hər iki nağılı oxuduqda xalqlar arasında ümumi cəhətləri görmək olur.
Sonra müsabiqənin qalibinə və iştirakçılara hədiyyələr təqdim edilib.
Həmin gün Horadiz şəhərində nümayiş olunan “Memarlıq-101” Koreya filmi tamaşaçıların böyük marağına səbəb olub.
Səfir bildirib ki, Koreya səfirliyinin 10 ildən az müddətdə fəaliyyət göstərməsinə baxmayaraq, Azərbaycan-Koreya münasibətləri yüksək səviyyədə inkişaf edir. Bu münasibətlər tək siyasi deyil, həm də iqtisadi və mədəniyyət sahələrini əhatə edir. Səfirlik xalqlarımız arasında anlaşmanı inkişaf etdirmək məqsədilə müxtəlif tədbirlər həyata keçirir. Bu cür tədbirlər xalqlarımızı və ölkələrimizi daha da yaxınlaşdırır.
Layihənin bu il Azərbaycanın daha iki rayonunda da həyata keçirilməsi nəzərdə tutulur.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
