APA-nın məlumatına görə, hakim Qədim Babayevin sədrlik etdiyi prosesdə dövlət ittihamçısı Abbas Abbasov çıxış edərək bildirib ki, Lamiyə Quliyeva barəsindəki məhkəmə hökmü dəyişdirilməlidir.
Daha sonra zərərçəkən Aysel Ağayeva çıxış edərək deyib ki, Lamiyə Quliyeva ondan bir dəfə üzr istəməyib: “Sən bilirsən ki, mənim bacım ölüb, uşağını mənə veriblər. Sən bu hadisəni törədəndə mənim də balam var idi. Sənə qarşı heç bir şəxsi-qərəzim olmayıb. Sən mənə ayaqqabı atdın, bağışladım, nalayiq sözlərlə təhqir etdin bağışladım. Əgər həmin vaxt əynimdə hərbi geyim olmasaydı yanmışdım. Allah məni balalarıma bağışladı. Səni də ana olduğun üçün bağışlayıram”.
Lamiyə Quliyevanın vəkili Fəxrəddin Mehdiyev isə çıxışında Lamiyə Qulivevanın azadlığa buraxılmasını bütün ictimaiyyətin gözlədiyini vurğulayıb.
Daha sonra Lamiyə Quliyeva çıxış edib: “Azadlıqdan məhrum ediləndə 15 yaşım vardı. Elə bir mühitdə böyüdüm ki, hər zaman özümü qabağa verdim. 400-500 məhkumla bir yerdə yaşadım. Bir az əsəbi, çılğın olmuşam. Amma mənə çox haqsızlıq olub. İctimaiyyətdən xahiş edəm, mənim hərəkətimi normal qəbul etsinlər. Mən əxlaqsız qadın deyiləm. Bəli, həbsxanada ana oldum. Amma məni olanlara həyat, insanlar məcbur elədi. Buna görə insanlar günahkardır. Mən də azadlıqda ana olmağı istəyirdim”.
Bundan sonra məhkəmə müşavirəyə gedib. Müşavirədən sonra qərar elan olunub.
Qərara əsasən, protesti təmin edilib Lamiyə Quliyeva barəsində cəza dəyişdirilib. Onun barəsində 4 il 6 ay müddətinə azadlıqdan məhrum etmə cəzası təyin olunub. Həmin cəzanın müddəti başa çatdığı üçün L. Quliyeva məhkəmə zalından azadlığa buraxılıb.
Lamiyə Quliyeva jurnalistlərə açıqlamasında Azərbaycan dövlətinə, baş prokuror Zakir Qaralova, baş prokurorun müavini Namiq Əsgərova, onu müdafiə edən hər kəsə təşəkkür edib: “Mənə haqsızlıq edənlər bir gün cəzalarını çəkəcəklər”.
Qeyd edək ki, fevralın 4-də Baş Prokurorluq Lamiyə Quliyevanın barəsində olan cinayət işi ilə bağlı protest verib.
Xətai Rayon Məhkəməsinin hakimi Habil Məmmədov tərəfindən protestin baxılma müddətinin bərpa olunması və protestə baxılması barədə qərar qəbul edilib. Bundan sonra iş Bakı Apellyasiya Məhkəməsinə göndərilib.
Xatırladaq ki, 1987-ci il təvəllüdlü Lamiyə Quliyeva 2003-cü ildə həbs edilib. Cinayət Məcəlləsinin 120-ci (qəsdən adam öldürmə) maddəsinə əsasən təqsirləndirilən L. Quliyeva və keçmiş nişanlısı Vüqar Əliyev 2003-cü ilin mayında Şəmkir rayonun sabiq icra başçısı Aslan Aslanovun oğlu Ruslanı qətlə yetirməkdə təqsirləndirilirlər. Respublika Ağır Cinayətlərə Dair İşlər üzrə Məhkəmənin hökmü ilə Vüqar Əliyev ömürlük, Lamiyə Quliyeva isə 10 il müddətinə azadlıqdan məhrum edilib. 2010-cu ildə isə L. Quliyevanın barəsində 317-ci (cəzaçəkmə müəssisəsinin və ya istintaq təcridxanasının normal fəaliyyətini pozma) maddəsi ilə cinayət işi başlanılıb. Həmin cinayət işi ilə əlaqədar onun cəzası 5 il 6 ay artırılıb.
Hazırda Vüqar Əliyev Qobustan həbsxanasında cəza çəkir.
Onu da qeyd edək ki, prokurorluğun verdiyi protest 317-ci maddə ilə bağlıdır.
L. Quliyeva bir müddət əvvəl ana olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
