Daxili siyasət

Daxili siyasət

Azərbaycanın hərbi doktrinası parlamentin payız sessiyasında qəbul ediləcək

10 iyul 2008 12:03 (UTC +04:00)

Bakı. Elbrus Seyfullayev-APA. Azərbaycanın hərbi doktrinası parlamentin payız sessiyasında qəbul ediləcək. APA-nın məlumatına görə, bu barədə Milli Məclis sədrinin birinci müavini Ziyafət Əsgərov parlamentin yaz və növbədənkənar sessiyasının başa çatması ilə bağlı keçirilən mətbuat konfransında bildirib. Birinci vitse-spiker sənədin indiyə kimi müzakirəyə çıxarılmamasını dünyada və regionda baş verən geostrateji dəyişikliklərlə əlaqələndirib. Z. Əsgərov deyib ki, sənəd qəbul olunarkən bütün reallıqlar nəzərə alınacaq. Ermənistan-Azərbaycan Dağlıq Qarabağ münaqişəsi ilə bağlı məsələnin parlamentdə müzakirə olunmaması ilə bağlı suala toxunan birinci vitse-spiker bu problemin həlli ilə əsasən dövlət başçısı və Xarici İşlər Nazirliyinin məşğul olduğunu bildirib: “Konkret razılaşma olarsa, biz bunu müzakirə edə bilərik. Predmetsiz müzakirə nəyə lazımdır?” “Təhsil haqqında” qanun layihəsinin beynəlxalq ekspertizaya verildiyini deyən Z. Əsgərov sənədin müzakirəyə çıxarılmaması ilə bağlı ajiotaj yaradıldığını bildirib: “Bu qanun layihəsinin qəbul olunmasını əngəlləyən heç bir qüvvə yoxdur. Sadəcə biz daha təkmil qanun qəbul etmək istəyirik”. Parlament sədrinin birinci müavini “Alternativ xidmət haqqında” qanun layihəsinə də münasibətini açıqlayıb. Onun sözlərinə görə, bu qanun layihəsi də müzakirəyə hazırlanır: “Azərbaycan müharibə şəraitində olduğu üçün bu sənəd qəbul olunanda ölkənin reallıqları nəzərə alınacaq”.