Daxili siyasət

Ana səhifə

Daxili siyasət

Azərbaycan prezidenti istehsalatda sağlamlığı pozulmuş və ya həlak olmuş işçiyə aylıq ödənc üzrə borcların tənzimlənməsi qaydalarını təsdiqləyib

05 avqust 2008 06:56 (UTC +04:00)

Prezidentin mətbuat xidmətindən APA-ya daxil olan məlumata görə, prezident imzaladığı fərmanla “Özəlləşdirilən və idarəetməyə verilən dövlət müəssisələrinin istehsalat qəzası, yaxud peşə xəstəliyi nəticəsində sağlamlığı pozulmuş işçisinə və ya bu səbəbdən həlak olmuş işçisinin ailə üzvlərinə və himayəsində olan digər şəxslərə aylıq ödənc üzrə borclarının tənzimlənməsi Qaydaları”nı təsdiqləyib.
Təsdiqlənmiş qaydalar fərman rəsmi mətbuatda dərc olunanadək özəlləşdirilməsi barədə qərar qəbul edilmiş, lakin özəlləşdirilməsi başa çatmamış dövlət müəssisələri, 2003-cü il 27 sentyabr tarixindən bu qaydalar qüvvəyə minənədək özəlləşdirilməsi başa çatmış dövlət müəssisələri və bu qaydalar qüvvəyə minənədək idarəetməyə verilən dövlət müəssisələrinin istehsalat qəzası və yaxud peşə xəstəliyi nəticəsində sağlamlığı pozulmuş işçisinə və ya bu səbəbdən həlak olmuş işçisinin ailə üzvlərinə və himayəsində olan digər şəxslərə aylıq ödənc üzrə borclarına şamil olunur.
Aylıq müavinətin məbləğinə gəldikdə, nəzərdə tutulan dövlət müəssisələrinin müvafiq dövr üçün istehsalat qəzası və yaxud peşə xəstəliyi nəticəsində sağlamlığı pozulmuş işçisinə və ya bu səbəbdən həlak olmuş işçisinin ailə üzvlərinə və himayəsində olan digər şəxslərə aylıq ödənc əvəzinə dövlət büdcəsinin vəsaiti hesabına aşağıdakı məbləğlərdə aylıq müavinət verilir:
- peşə əmək qabiliyyəti 29 faizədək itirildikdə - 30 manat;
- peşə əmək qabiliyyəti 30 faizdən 59 faizədək itirildikdə - 40 manat;
- peşə əmək qabiliyyəti 60 faizdən 79 faizədək itirildikdə - 50 manat;
- peşə əmək qabiliyyəti 80 faiz və daha çox itirildikdə - 60 manat;
- həlak olduqda - 70 manat.
Nəzərdə tutulan dövlət müəssisələrindən istehsalat qəzası, yaxud peşə xəstəliyi üzrə, eləcə də bu səbəbdən ailə başçısını itirməyə görə aylıq ödənc almaq hüququ olan şəxslər bu ödəncin əvəzinə müvafiq qaydada aylıq müavinət almaq hüququna malikdirlər.
Göstərilən müəssisələrin istehsalat qəzası, yaxud peşə xəstəliyi nəticəsində sağlamlığı pozulmuş işçisinə və ya bu səbəbdən həlak olmuş işçisinin ailə üzvlərinə və himayəsində olan digər şəxslərə aylıq müavinətin təyin edilməsi və ödənilməsi Əmək və Əhalinin Sosial Müdafiəsi Nazirliyinin yerli orqanları tərəfindən həyata keçirilir.
Qaydaların pozulmasına görə təqsirkar şəxslər qanunvericiliklə müəyyən edilmiş qaydada məsuliyyət daşıyırlar.

İlham_Əliyev_fərman