Daxili siyasət

Ana səhifə

Daxili siyasət

Müsavat MNTK-nın üzvü: “Rauf Arifoğlu prezidentliyə namizədliyini versə, onun məsələsinə baxılacaq”

06 avqust 2008 13:25 (UTC +04:00)

Bakı. Elnur Məmmədli – APA. “Mən Müsavat Partiyasının prezident seçkilərində iştirakının tərəfdarı idim. Məclisdən əvvəl də öz fikirlərimi bildirmişdim. Amma görünür vəziyyət çox ağırdır ki, partiya belə qərar qəbul etdi”. Bunu APA-ya açıqlamasında Müsavat Partiyasının Məclis üzvü Hikmət Hacızadə deyib. Onun sözlərinə görə, əsas məsələ seçkidə iştirak edib-etməmək qərarını rayon təşkilatlarının qəbul etməsidir: “Çünki seçkilərdə əsas çətinlik onların üzərinə düşəcək. Onlar da belə qərar verdilər. Mən buna təəssüflənsəm də, belə qərar çıxarıldı və bunu qəbul etməliyik. Mən seçkidə iştirakın əleyhinə olanların arqumentlərini də qəbul edirəm ki, açıq siyasi fəaliyyət üçün imkan qalmayıb, maneçilik var və maliyyə imkanları yoxdur. Amma mən yenə də seçkiyə getməyin tərəfdarı idim”.

“Yeni Müsavat” qəzetinin baş redaktoru Rauf Arifoğlunun öz namizədliyini irəli sürməklə bağlı fikirlərinə gəldikdə, H. Hacızadə deyib ki, baş redaktor vətəndaş kimi seçkiyə qoşula bilər: “Bu, partiyanın qərarının əleyhinə getmək demək deyil, mən bu məsələdə heç bir problem görmürəm. Amma partiya ona yardımçı olmamalıdır. Çünki seçkidə iştirak etməməklə bağlı qərar qəbul olunub. Ümumiyyətlə, Müsavatda insanlar kifayət qədər azaddır. Onlar istədiyini danışa bilərlər və buna görə heç bir cəza düşmür. Buna görə də Rauf Arifoğlu fərdi şəkildə istədiyini edə bilər, amma partiya adından çıxış etməməlidir”. “R. Arifoğlunun namizəd olmasını istəyirsinizmi” sualına cavab olaraq H. Hacızadə “bu məsələnin mənə dəxli yoxdur” cavabını verib. O, həmçinin, Məclisin iclası keçirilən vaxt Türkiyədə olduğundan toplantıda iştirak etmədiyini qeyd edib.

Müsavatın Mərkəzi Nəzarət Təftiş Komissiyasının (MNTK) üzvü Əlövsət Talışxanlı isə APA-ya deyib ki, R. Arifoğlu namizədliyini irəli sürərsə, sözügedən qurumda onun məsələsinə baxıla bilər. Ə. Talışxanlı prezidentliyə namizədliyi irəli sürməyi hüquqi baxımdan Məclisin qərarına zidd sayır: “Mən Rauf Arifoğlu ilə bağlı sözümü hələ iki il əvvəl demişəm, dediklərim də təsdiqini tapır. Bu onun kimlərinsə qarşısında götürdüyü son öhdəliklərdir ki, yerinə yetirir. Xüsusi tapşırıq alan Rauf Arifoğlu öz ampluasında qalır. Təbii ki, biz bu məsələləri araşdırıb baxa bilərik. Əgər o özünü müsavatçı sayırsa, qərara tabe olmalıdır”.

R. Arifoğlu isə APA-ya açıqlamasında deyib ki, partiya Nizamnaməsinə görə hər bir üzv qəbul edilən qərarlarla bağlı mövqe bildirmək, təbliğat aparmaq, öz fikrində qalmaq hüququ var: “Ortada Nizamnamə pozuntusu yoxdur və mən Nizamnaməni yaxşı bilirəm. Təbii ki, buna təşəbbüslər ola bilər, amma bu, istənilən halda demokratiyanın əlifbasına zidd olacaq. Bu cür söz-söhbətlərin mənim düşüncəmə heç bir təsiri yoxdur”.

Rauf_Arifoğlu_seçki