Daxili siyasət

Ana səhifə

Daxili siyasət

Qulamhüseyn Əlibəyli: “AXCP-Müsavat birliyinə ehtiyac var”

07 avqust 2008 11:20 (UTC +04:00)

Bakı. Elnur Məmmədli – APA. “Müxalifət partiyalarının əməkdaşlığı üçün hazırda əlverişli şərait yaranıb. Tərəflər bu əməkdaşlıqla bağlı xoş niyyətlərini bildirib və yəqin ki, yaxın dövrdə birbaşa məsləhətləşmələrə başlamaq olar”. Bu sözləri APA-ya açıqlamasında Müsavat partiyasının Məclis sədri Sülhəddin Əkbər deyib. Onun sözlərinə görə, bütün tərəflər danışıqlara başlamaq üçün hazır görünür. S. Əkbər partiyalar arasında qeyri-rəsmi əlaqələrin olduğunu, müəyyən söhbətlərin aparıldığını, lakin rəsmi məsləhətləşmənin olmadığını vurğulayıb. Məclis sədri bütün tərəflərin danışıqlara başlamağa hazır olduğunu deyərək vaxt itirməməyə çağırıb.

S. Əkbər “Azadlıq” bloku ilə də müəyyən fikir mübadiləsinin olduğunu, lakin bunun danışıq səviyyəsinə gəlib çatmadığını qeyd edib: “Hələlik bu formata ad qoymağa tələsmək lazım deyil ki, koalisiya, birlik yaranacaq və ya başqa bir funksional birlik olacaq. Bu danışıqlara da hansı tərəflərin qoşulacağını demək olmaz. Bunu tərəflər özləri müəyyən edir”.

AXCP Ali Məclisinin sədri Qulamhüseyn Əlibəyli isə APA-ya bildirib ki, hələlik bu barədə partiyada müzakirə aparılmayıb. Ümumilikdə müxalifətin birliyinin yaradılması ilə bağlı təklifləri müsbət qiymətləndirən AM sədri bu məsələni partiyada müzakirə edəcəklərini vurğulayıb: “Zaman göstərib ki, bu partiyalar konkret məsələlər barəsində əməkdaşlıq edə bilirlər. Eyni zamanda bir-biri ilə qarşıdurma halları da olur. Düşünürəm ki, hər hansı birliyin yaranmasının prezident seçkilərinə təsiri olmayacaq. Amma gələcək fəaliyyət üçün belə birliyə ehtiyac var”.

AXCP-Müsavat