Daxili siyasət

Ana səhifə

Daxili siyasət

Azərbaycan prezidentinin Mingəçevirə səfəri başa çatıb

03 mart 2009 13:00 (UTC +04:00)

Mingəçevir - APA. Mingəçevirdə səfərdə olan Azərbaycan prezidenti İlham Əliyev “KÜR” elektron avadanlıqları istehsalı MMC-nin fəaliyyəti ilə tanış olub. Prezidentin mətbuat xidmətindən APA-ya verilən məlumata görə, dövlət başçısına məlumat verilib ki, konveyerdə gün ərzində 140 kompüter avadanlığı yığılır. “KÜR” ticarət markası altında 22 konfiqurasiyada, 5 modeldə informasiya köşkləri, 2 modeldə stasionar telefon aparatları da buraxılır. 2005-2008-ci illərdə 29 min ədəddən çox fərdi kompüter, 127 ədəd informasiya köşkü, 22 min telefon aparatı istehsal edilib.

Hazırda müəssisədə 62 nəfər işləyir. Orta aylıq əmək haqqı 230 manatdır. Azərbaycanda bu qəbildən olan ilk müəssisədə quraşdırılmış avadanlıq Almaniya və İsrail şirkətlərindən alınıb. İstehsal edilən kompüterlərə 3 il zəmanət verilir. Bu müddətdə kompüterlərə həm stasionar, həm də səyyar servis xidmətləri göstərilir.

Prezident İ. Əliyev müəssisənin istehsal etdiyi məhsulların sərgisinə də baxıb. Bildirilib ki, hazırda yeni kompüterlər - Multi PC, Mini PC, Multimedia GS istehsal edilir. Bu yaxınlarda fotoköşklərin istehsalına da başlanıb. Bu avadanlıq vasitəsilə Azərbaycanda ilk dəfə olaraq müştəri 10x15 sm ölçüdə fotoşəkli tez bir zamanda və kənar müdaxilə olmadan çap etdirə bilər. Avadanlığın hissələri Yaponiya şirkətlərinin istehsalıdır. Bu cür köşklər ilk olaraq Bakı Dövlət Universitetində və Azərbaycan Texniki Universitetində qoyulub. İnternet xarakterli köşklər də bu zavodda istehsal olunur. İnsanlar müəyyən yerlərdə quraşdırılan bu köşklərdən pulsuz internetdən istifadə edərək, lazımi informasiya ala bilərlər. Köşkdə xüsusi proqramın köməyi ilə kommunal xidmətlərə görə borcların ödənilməsini həyata keçirmək, avtobus və təyyarə reyslərinin cədvəlini öyrənmək, dövlət orqanlarının internet səhifəsindən istifadə etmək olar.

Əmək və Əhalinin Sosial Müdafiəsi Nazirliyinin sifarişi ilə hazırlanan köşklərə daxil olmaqla isə paytaxtda və regionlarda vakant iş yerlərinin siyahısı ilə tanış olmaq mümkündür. Müəssisənin Bakıda və Gəncədə ticarət agentləri fəaliyyət göstərir.
Dövlət başçısına səyyar mobil texniki xidmət maşını haqqında da məlumat verilib.

Prezident İ. Əliyev “Mingəçevir İZOLİT” ASC və “İnterenerji” MMC-də də olub, “River side” mehmanxanasının açılışında iştirak edib.

Mingəçevirdə “Kür” Olimpiya tədris-idman mərkəzinin tikintisi ilə tanış olan dövlət başçısına məlumat verilib ki, burada Avropada, o cümlədən MDB məkanında bənzəri olmayan avarçəkmə bazası yaradılacaq. Tikinti işlərinə 2007-ci ildə başlanılıb. Tikintidə 240 nəfər çalışır, onlardan 120-si Serbiyadan gəlib. Layihəyə əsasən, burada inzibati bina, üzgüçülük hovuzu, gəmini xatırladan 6 mərtəbəli 250 yerlik mehmanxana, idman salonu, avarçəkmə klubu, kotteclər, qüllə, tennis kortu, qayıqların saxlanması üçün ellinq daxildir. Mərkəzin ilin sonunda istifadəyə verilməsi nəzərdə tutulur.

Bununla da, Azərbaycan prezidentinin Mingəçevirə səfəri başa çatıb.

Əliyev_Mingəçevir