Daxili siyasət

Ana səhifə

Daxili siyasət

Millət vəkilləri Azərbaycan hökumətinin hesabatına münasibət bildiriblər

13 mart 2009 12:05 (UTC +04:00)

Bakı. Elbrus Seyfullayev - APA. Milli Məclisdə Nazirlər Kabinetinin 2008-ci ildəki fəaliyyəti ilə bağlı hesabatın müzakirəsi zamanı çıxış edən millət vəkilləri bir sıra təkliflər səsləndiriblər. APA-nın xəbərinə görə, millət vəkili Nəsib Nəsibli hökumətin hesabatının ötənilki hesabatlardan fərqlənmədiyini bildirib: “Təkcə rəqəmlər dəyişib. Dünyada böhran gedir, hələ bir neçə il də davam edəcək. Amma bu hesabat olduqca optimistdir. Sanki böhran Azərbaycana təsir etməyib. Lakin reallıq başqadır. Azərbaycanda da böhran hiss olunmaqdadır”. Deputat Azərbaycanda korrupsiya, inhisarçılıq, neftdən asılılığın hökm sürdüyünü qeyd edərək hökumətin fəaliyyətini qeyri-qənaətbəxş sayıb.

Millət vəkili Əli Hüseynov deyib ki, ümumdünya maliyyə böhranının Azərbaycana o qədər də təsiri olmayıb. O, ölkə rəhbərliyinin qabaqlayıcı tədbirlər görülməsi ilə bağlı tapşırıqlar verdiyini, müəyyən işlər görüldüyünü qeyd edərək bildirib ki, 2008-ci ildə əhalinin təkcə pul gəlirləri 36 faiz artıb: “Dünyada isə bunun əksi olan proses gedir. Azərbaycan iqtisadiyyatı təkcə neftdən, qazdan asılı deyil”. Millət vəkili Azərbaycanda görülən işlərin, o cümlədən korrupsiyaya qarşı atılan addımların hamısının hesabatda əks olunmadığını deyib. Ə. Hüseynov təklif edib ki, Azərbaycanın iqtisadi qurumları beynəlxalq təşkilatlarla əlaqələrini gücləndirməli, eləcə də israfçılıq məsələlərinə diqqət yetirilməlidir.

Deputat Asəf Hacıyev isə bildirib ki, elmə ayrılan vəsait büdcənin artım dinamikasına adekvat deyil. O, elmə ayrılan vəsaitin artırılmasını təklif edib.

Millət vəkili Mübariz Qurbanlı hesabatın peşəkar və yüksək səviyyədə hazırlandığını vurğulayıb.

Deputat Gülhüseyn Əhmədov bildirib ki, ölkəyə idxal olunan taxıl üçün əlavə dəyər vergisi və gömrük rüsumu bərpa olunmalı, pambıqçılıq inkişaf etdirilməlidir.

Millət vəkili Fazil Mustafa çıxışında Azərbaycanda antiböhran proqramının tətbiq olunmasının vacibliyini bildirib: “Bütün dünya böhrana qarşı necə mübarizə aparmaqdan danışır, Azərbaycanın isə səsi çıxmır”. Deputat böhranla bağlı ölkədə tikinti sektorunda işlərin demək olar ki, dayandırıldığını deyib. O, kənd təsərrüfatına xüsusi diqqət ayrılmasını da təklif edib.

Hökumətin hesabatı ilə bağlı müzakirələr günün ikinci yarısında davam etdiriləcək.