Daxili siyasət

Ana səhifə

Daxili siyasət

Azərbaycan ictimaiyyəti Türkiyə-Ermənistan yaxınlaşmasını mənfi qarşılayıb

14 mart 2009 12:48 (UTC +04:00)

Bakı. Ramil Məmmədli – APA. Türkiyə ilə Ermənistan arasında razılaşma əldə olunduğu və bu razılaşmanın aprelin 24-dən sonra açıqlanacağı ilə bağlı Türkiyə mətbuatında çıxan xəbərlər Azərbaycan politoloqları və partiya funksionerləri tərəfindən mənfi qarşılanıb. Sabiq dövlət müşaviri, politoloq Vəfa Quluzadə APA-ya bildirib ki, Türkiyənin Ermənistanla əlaqələrini istiləşdirməsi Azərbaycanın mövqelərini zəiflədə bilər: “Amma dünyanın böyük dövlətləri bu əlaqələrin yaxşılaşdırılmasının tərəfdarıdır. Onsuz da Türkiyə ilə Ermənistanın sərhədlərinin bağlı olmasından biz heç nə udmadıq. Ermənistanın NATO ölkəsi ilə əlaqə qurmasının nə ilə nəticələnəcəyini gözləmək lazımdır”. Politoloqun sözlərinə görə, regionda siyasi balans dəyişməsə, Dağlıq Qarabağ problemi uzun müddət həll edilməmiş qalacaq: “ABŞ Rusiyanı Qafqazdan sıxışdırıb çıxarsa və Ermənistanı müstəqil dövlət edə bilsə, onda Qarabağ məsələsi həll ediləcək”.

Müsavat Partiyasının Məclis sədri Sülhəddin Əkbər Türkiyənin işğalçı Ermənistanla münasibət qurmasından təəssüfləndiyini deyib: “Türkiyə beynəlxalq arenada gedən prosesləri nəzərə alaraq bu addımı atır. Amma Ermənistan işğalçı ölkə olaraq cəzalandırılmaq əvəzinə mükafatlandırılarsa, bu, yaxşı nəticələnməyəcək”.

Politoloq Rasim Musabəyov isə hesab edir ki, Türkiyə mətbuatının bu mövzuda yazıları ictimai rəyi öyrənmək məqsədi daşıyır: “Türkiyənin öz maraqları var və hər məsələdə mütləq Azərbaycanla razılaşması mümkün deyil. Ancaq Türkiyədə dərk edirlər ki, Azərbaycan Ermənistanla müqayisədə daha əhəmiyyətli ölkədir”. O, prosesləri soyuqqanlılıqla izləməyi məqsədəuyğun hesab edib.

Milli Məclisin deputatı Aydın Mirzəzadə isə düşünür ki, atılacaq hər bir addım Türkiyə cəmiyyətinin adekvat reaksiyasına səbəb olacaq: “İndiyə qədər Türkiyə Azərbaycanın yanında olduğunu bəyan edib. İndi Ermənistanla dostlaşması əks reaksiyaya səbəb olacaq. Türkiyə iqtidarının ona qarşı beynəlxalq səviyyədə çirkin kampaniya aparan ölkə ilə münasibətləri yaxşılaşdırması başadüşülən deyil. Amma bu, onların öz işidir. Hər halda, proseslər Türkiyənin Azərbaycanla müttəfiqliyinin səmimiliyini ortaya çıxaracaq”.

Ümid Partiyasının sədri, Milli Məclisin deputatı İqbal Ağazadə də Türkiyə ilə Ermənistanın yaxınlaşmasının arzuolunan hal olmadığını vurğulayıb: “Türkiyə ciddi düşünməlidir. AKP iqtidarının yeritdiyi siyasəti qəbul etməyənlərdən biriyəm. Belə çıxır ki, AKP strateji müttəfiqlik anlayışının yeni düzənini müəyyən etmək istəyir. Hər halda, onlarda bir ərəb təəssübkeşliyi hiss olunur”.

Qeyd edək ki, Türkiyə hökumətinə yaxın olan “Sabah” və “Star” qəzetləri 2007-ci ilin sentyabrında İsveçrənin paytaxtı Berndə başlayan gizli Türkiyə-Ermənistan danışıqlarında tərəflərin bir sıra məsələlər üzrə razılığa gəldiklərini və bu razılığın uydurma “erməni soyqırımı”nın qeyd olunacağı 24 apreldən sonra açıqlanacağını yazıb.

türk_erməni