Daxili siyasət

Ana səhifə

Daxili siyasət

Azərbaycan prezidentinin iştirakı ilə Müdafiə Sənayesi Nazirliyinin Elmi Tədqiqat İnstitutunun açılışı olub

16 mart 2009 12:52 (UTC +04:00)

Bakı-APA. Martın 16-da Müdafiə Sənayesi Nazirliyinin Elmi Tədqiqat İnstitutunun açılışı olub. Azərbaycan prezidenti, Silahlı Qüvvələrin Ali Baş Komandanı İlham Əliyev mərasimdə iştirak edib. Prezidentin mətbuat xidmətindən APA-ya verilən məlumata görə, dövlət başçısı ulu öndər Heydər Əliyevin büstünün önünə gül dəstəsi qoyduqdan sonra institutun açılışını bildirən lenti kəsib, binanın əvvəlki və təmirdən sonrakı vəziyyətini əks etdirən videosüjetə, fotoguşəyə baxıb.

Dövlət başçısına məlumat verilib ki, institut mürəkkəb, elm tutumlu müdafiə təyinatlı məhsulların yaradılması və təkmilləşdirilməsi ilə məşğul olan ixtisaslaşmış dövlət müəssisəsidir. İnstitutun mühəndis-laboratoriya korpusu, təcrübi-istehsalat zavodu, sınaq sahəsi, atıcılıq tiri var. Hazırda 30-dan çox şöbədə 200-dən artıq mütəxəssis çalışır. İnstitut ən son texnoloji avadanlıqla təchiz edilib. Kadrların ixtisasının artırılmasına xüsusi diqqət yetirilir. Avtomatlaşdırılmış idarəetmə sistemləri, hesablama texnikası, yüngül atıcı silahların yaradılması, döyüş vasitələrinin tərkib hissələrinin, radiolokasiya stansiyalarının rəqəmsal texnologiyalar əsasında təkmilləşdirilməsi və digər məsələlər institutun diqqət mərkəzindədir.

Burada yerinə yetirilən elmi tədqiqat və təcrübi konstruktor işlərinin nəticələri əsasında yaradılan müdafiə təyinatlı məhsulların laboratoriya və təcrübi nümunələri hazırlanır. Zavodda mexaniki emal, dəqiq mexanika, radioelektron cihazqayırma, yığma, sazlama, rəngləmə, qaynaq, termiki emal və sınaq sahələri fəaliyyət göstərir. Ali Baş Komandana istehsal prosesi və hazırlanan məhsullar barədə ətraflı məlumat verilib. Dövlət başçısı zavodda istehsal olunmuş məhsulların sınaqdan keçirilməsini əks etdirən videogörüntülərə baxıb.

Daha sonra Prezident İlham Əliyev müəssisədə istehsal olunan hazır məhsulların sərgisi ilə tanış olub, onların texniki-iqtisadi göstəriciləri və keyfiyyəti ilə maraqlanıb. “BTR-70M” zirehli transportyorunda institutda aparılmış təkmilləşdirmə işləri barədə dövlət başçısına ətraflı məlumat verilib.

Azərbaycan prezidenti gələcəkdə istehsal sahələrinin daha da inkişaf etdirilməsi ilə bağlı müvafiq tapşırıq və tövsiyələrini verib.