Daxili siyasət

Ana səhifə

Daxili siyasət

QAT 8 may tarixinin “İşğal olunmuş ərazilər günü” kimi qeyd olunması xahişi ilə Milli Məclisə müraciət edib

28 aprel 2009 10:13 (UTC +04:00)

Bakı. Ramil Məmmədli-APA. Qarabağ Azadlıq Təşkilatı (QAT) hər ilin 8 may tarixinin “İşğal olunmuş ərazilər günü” kimi qeyd olunması ilə bağlı Milli Məclisə müraciət edib. QAT mətbuat xidmətindən APA-ya verilən məlumata görə, müraciətdə bildirilib ki, Şuşa şəhərinin işğal edildiyi 8 may tarixinin “İşğal olunmuş ərazilər günü” kimi elan olunması erməni işğalının dünya ictimaiyyətinin diqqətinə çatdırılmasına, ölkədə vətənpərvərlik tərbiyəsinin, düşmənə nifrət hissinin gücləndirilməsinə, döyüş əhval-ruhiyyəsinin yüksəldilməsinə təkan verə bilər: “Biz işğal olunmuş ərazilər dedikdə, İrəvan, Zəngəzur, Göyçə də daxil olmaqla son 100 il ərzində ermənilər tərəfindən zəbt olunan torpaqlarımızın hamısını nəzərdə tuturuq. Şuşanın təkcə Qarabağ üçün deyil, ümumiyyətlə, bütün Azərbaycan üçün qədimlik, mədəniyyət və mənəviyyat simvolu, rəmzi olduğunu, özündə müqəddəslik anlamı daşıdığını nəzərə alaraq məhz bu işğal tarixinin “İşğal olunmuş ərazilər günü” kimi qeyd olunmasını təklif edirik. Bu təklif həmçinin saxta təbliğat yolu ilə Şuşanın tarixini, mədəniyyətini erməniləşdirməyə, Şuşanın taleyi ilə bağlı məsələni danışıqlar prosesindən çıxartmağa çalışan ermənilərin cəhdlərinin qarşısının alınmasına yönəlmişdir”.