Daxili siyasət

Ana səhifə

Daxili siyasət

Azərbaycan Milli Məclisində “Qeyri-hökumət təşkilatları haqqında” qanuna əlavə və dəyişikliklər layihəsinin müzakirəsi başlayıb

30 iyun 2009 10:37 (UTC +04:00)

Bakı. Elbrus Seyfullayev - APA. Milli Məclisin (MM) növbədənkənar sessiyasının növbəti iclası başlayıb. APA-nın xəbərinə görə, iclasda “Qeyri-hökumət təşkilatları haqqında” qanuna əlavə və dəyişikliklər layihəsinin müzakirəsi başlayıb. İclasda ABŞ-ın Azərbaycandakı səfirliyinin, Avropa Şurasının Azərbaycandakı İnformasiya Ofisinin və digər beynəlxalq təşkilatların təmsilçiləri də iştirak edirlər.

MM-in Hüquq siyasəti və dövlət quruculuğu komitəsinin sədri Əli Hüseynov deyib ki, müxtəlif təkliflər əsasında layihə üzərində iş aparılıb: “İndiyə qədər söz-söhbət gəzirdi ki, layihə müzakirədən çıxarılıb. Heç kim unutmamalıdır ki, layihənin müzakirədən çıxarılmasının hüquqi proseduru var. Sözlə məsələ həll olunmur”.

Dəyişikliklər barədə danışan komitə sədri deyib ki, QHT-lərin qeydiyyatına görə inzibati məsuliyyəti, məcburi qeydiyyatı, QHT üzvlərinin məcburi reyestrinin aparılmasını nəzərdə tutan müddəalar layihədən çıxarılıb, fondlarla bağlı nizamnamə kapitalı 50 min manatdan 10 min manatadək azaldılıb. Layihədə Azərbaycanda yaşayan əcnəbilərin QHT yaratmaq hüququ tanınır, həmçinin, QHT-lərin filial və nümayəndəlilərinin yaradılması üçün yeni norma müəyyənləşdirilib.

Layihədə qeyd olunub ki, xarici QHT-lərin Azərbaycanda fəaliyyətinin saziş əsasında həyata keçirilməsi nəzərdə tutulur. Ə. Hüseynov deyib ki, QHT-lərin auditinin aparılması təklifi də layihədən çıxarılıb. Komitə sədri bu dəyişikliklər nəticəsində “Dövlət rüsumu haqqında” qanuna təklif edilən əlavə və dəyişiklik layihəsinin də avtomatik olaraq MM-in müzakirəsindən çıxarıldığını deyib.

O deyib ki, “Dini etiqad azadlığı haqqında” qanuna təklif olunana əlavə və dəyişikliklər layihəsinin müzakirəsi isə heç bir dəyişiklik olmadan davam etdirilir.

Bunun ardınca layihələrlə bağlı müzakirələr başlanıb.

QHT_qanun