Daxili siyasət

Ana səhifə

Daxili siyasət

Azərbaycan prezidentinin sədrliyi ilə Nazirlər Kabinetinin 2009-cu ilin birinci yarısının yekunlarına həsr olunmuş iclası keçirilib

22 iyul 2009 13:33 (UTC +04:00)

APA-nın məlumatına görə, iclasda giriş nitqi ilə çıxış edən prezident İ. Əliyev bir ilə yaxındır, qlobal maliyyə böhranı ilə əlaqədar dünyanın əksər ölkəsində ciddi iqtisadi problemlər yaşandığını xatırladaraq bildirib ki, görülən tədbirlər, o cümlədən son illərdə aparılan islahatlar nəticəsində böhranın Azərbaycana təsiri minimuma endirilib.

Bu ilin birinci yarısında ümumi daxili məhsul (ÜDM) 3,6 faiz artıb, qeyri-neft sektorunda artım 4,1 faiz olub: “Bu da onu göstərir ki, ölkəmizin gələcəyi neft amilindən daha az asılıdır. İlin birinci yarısında sosial məsələlərin həlli uğurla davam edib, bu sahədə mövcud proqramlar icra olunub. İnflyasiyanın səviyyəsi düşərək son 6 ayda 3,7 faiz olub. Bu dövrdə əhalinin pul gəlirləri 19 faiz, orta aylıq əmək haqqı isə 15 faiz artıb”.

Dövlət başçısı deyib ki, ilin birinci yarısında Azərbaycanda 35 min yeni iş yeri yaradılıb, onlardan 25 mini daimidir. Bu dövrdə regionların sosial-iqtisadi inkişafı Dövlət Proqramının ikinci mərhələsinin icrasına başlanıb. Sahibkarlığın inkişafı üçün dövlət tərəfindən ayrılan kreditlərin məbləği artırılıb. Azərbaycan enerji təhlükəsizliyi sahəsində də qarşıda duran vəzifələri icra edib, neft-qaz hasilatı artıb: “İndi Azərbaycan qonşu ölkələrə qaz ixrac edir. Bu il istifadəyə veriləcək Sumqayıt və Quba elektrik stansiyaları Azərbaycanın elektrik enerjisi sahəsində ixrac qabiliyyətini daha da gücləndirəcək”.

İlin ötən altı ayında nəqliyyat sektorunda da proqramların icra edildiyini bildirən prezident bunun Azərbaycanda nəqliyyat infrastrukturunun yeniləşməsinə xidmət etdiyini söyləyib. Dövlət başçısı ordu quruculuğunun da diqqət mərkəzində olduğunu vurğulayıb: “Ötən ay keçirilən genişmiqyaslı hərbi təlimlər məhz bundan xəbər verir”.

Prezident Ermənistan-Azərbaycan, Dağlıq Qarabağ münaqişəsi ilə bağlı danışıqların davam etdirildiyini bildirib, bu məsələdə Azərbaycanın mövqeyinin birmənalı olduğunu və beynəlxalq hüquqa söykəndiyini bir daha vurğulayıb.

Dövlət başçısı Azərbaycanın gələcək inkişaf perspektivlərinin yüksək olduğunu deyib: “Biz öz işlərimizi planlı şəkildə görürük və belə olan halda, istənilən məsələ həllini tapa bilər”.

İclasda çıxış edən maliyyə naziri Samir Şərifov, kənd təsərrüfatı naziri İsmət Abasov, ekologiya və təbii sərvətlər naziri Hüseynqulu Bağırov və Dövlət Gömrük Komitəsinin sədri Aydın Əliyev ilin birinci yarısının sosial-iqtisadi inkişafının yekunları barədə məlumat veriblər.

Prezident İ. Əliyev iclasda yekun nitqi söyləyib.