Daxili siyasət

Ana səhifə

Daxili siyasət

Milli Məclis “Azərbaycanın sülhməramlı əməliyyatlarda iştirakı haqqında” qanun layihəsini ikinci oxunuşda qəbul edib

25 dekabr 2009 10:51 (UTC +04:00)

Bakı. Elbrus Seyfullayev - APA. Milli Məclisin bugünkü iclasında “Azərbaycanın sülhməramlı əməliyyatlarda iştirakı haqqında” qanun layihəsi ikinci oxunuşda müzakirə olunub. APA-nın xəbərinə görə, sənədi Milli Məclisin Təhlükəsizlik və müdafiə komitəsinin üzvü Səyavuş Novruzov təqdim edib. Deputat deyib ki, birinci oxunuşdan sonra layihə üzərində iş davam etdirilib: “Sülhün qorunması, bərqərar edilməsi və ya bərpası üzrə əməliyyatlarda iştirak edən Azərbaycan hərbi qulluqçularının sosial müdafiəsi, həmçinin onların ailə üzvlərinə əlavə sosial imtiyazların və təminatların verilməsi kimi məsələlər konkret qanunla tənzimlənməlidir. Qanun layihəsinin konseptual baxımdan vacibliyi göstərir ki, ölkəmizdə bu sahənin hüquqi bazası formalaşdırılmalıdır” .

Müzakirələrdə çıxış edən deputat Zahid Oruc bildirib ki, sənəddə Azərbaycan özü təcavüzə məruz qalmazsa, bütün dövlətlərlə münasibətlərdə güc tətbiq etməkdən və ya güc tətbiq etməklə hədələməkdən imtina etməsi ilə bağlı müddəa əksini tapıb: “Bu müddəanın davamı olaraq qeyd olunur ki, digər dövlətlərlə ərazi mübahisələri və münaqişələri, yaxud digər mübahisə və münaqişələr yarandıqda Azərbaycan ilk növbədə tənzimləmənin və vasitəçiliyin mövcud olan dinc mexanizmlərini tətbiq etməlidir. Azərbaycanın, yaxud onun vətəndaşlarının iştirakı ilə beynəlxalq, yaxud beynəlxalq xarakter daşımayan münaqişə baş verdiyi təqdirdə və həmin münaqişənin dayandırılması, tənzimlənməsi üçün iştirak, vasitəçilik və müdaxilə tələb olunduqda Azərbaycan BMT və ATƏT-in strukturuna bu barədə dərhal məlumat verməli, həmin təşkilatlar yardım və vasitəçilik etməyə hazır olduqları halda, ilk növbədə, onların yardımını, yaxud vasitəçiliyi qəbul etməlidir. Azərbaycan öz ərazisində sülhməramlı əməliyyatlar aparmaq üçün digər dövlətlərə, yaxud beynəlxalq təşkilatlara müraciət edə və ya onlardan yardım istəyə bilər. Məncə, bu müddəalar ətrafında ciddi düşünülməlidir. Sülhməramlıların iştirakı ilə bağlı kvota müəyyən edilməlidir”.

Baba Tağıyev deyib ki, bu sənədin müzakirəsi çox önəmlidir. Onun sözlərinə görə, sülhün qorunmasında, terrorizmə qarşı mübarizədə Azərbaycanın iştirakı çox önəmlidir.

Qüdrət Həsənquliyev deputat Zahid Orucun qaldırdığı məsələyə diqqətlə yanaşılmasını vacib sayıb. Deputat, həmçinin sənədə bir müddəanın əlavə olunmasını təklif edib. Onun sözlərinə görə, qanun layihəsinə BMT-nin mandatı olmadan sülhməramlı əməliyyatların keçirilməsinin qadağan edilməsi barədə müddəa əlavə olunmalıdır: “Bundan başqa, Azərbaycan əraziləri işğaldan azad olunmaya qədər humanitar yardımlar etməklə kifayətlənməlidir. Biz müharibə şəraitindəyik, əsgərimizi başqa yerə göndərə bilmərik” .

Müzakirələrdən sonra qanun layihəsi ikinci oxunuşda qəbul edilib.