Daxili siyasət

Ana səhifə

Daxili siyasət

Ceyhun Osmanlı: ““İrəli” İctimai Birliyinə üzv olan gənclərin əsas ideyası Azərbaycandır” - MÜSAHİBƏ

Ceyhun Osmanlı: ““İrəli” İctimai Birliyinə üzv olan gənclərin əsas ideyası Azərbaycandır” - <font color=red>MÜSAHİBƏ</font>

28 dekabr 2009 07:43 (UTC +04:00)

- “İrəli” İctimai Birliyi yaradılan zaman üzərinə götürdüyü funksiyanı yerinə yetirə bilibmi?

- Əlbəttə, istərdik ki, bu gün fəaliyyətimiz daha çox insanı əhatə esin. Çünki məqsədimiz insan kapitalının inkişafına yönəlib. Azərbaycan iqtisadiyyatı yeni bir mərhələyə qədəm qoyub. Fəaliyyətimiz də ondan ibarətdir ki, insanlarımızın da inkişafı bu şəkildə yeni mərhələyə qədəm qoysun. Ona görə də müasir insan yaratmağa yönələn çoxşaxəli layihələrə üstünlük veririk. Amma təşkilatımız öz çiyinlərində çəkə bildiyi qədər yük daşıya bilir. Ötən bir il ərzində həyata keçirdiyimiz layihələr 100 min insanı əhatə edə bilib. Fəaliyyətimizi gənclərin təşəbbüsləri əsasında qururuq. Əlbəttə, qarşıya qoyduğumuz məqsədlərə hələ çata bilməmişik.

- Azərbaycan gəncliyi təqdim etdiyiniz və ya təbliğ etdiyiniz yeniliyə hazırdırmı?

- Öncə bu yeniliyin nə olduğunu dərk etmək lazımdır. Biz cəmiyyətimizə amorf yeniliklər gətirmək üçün fəaliyyət göstərməməliyik. Hesablanmış, düzgün, dünya praktikasında uğurla sınaqdan çıxmış modelləri cəmiyyətimizə təlqin etməliyik. Kənardan sırınan, zorla təqdim olunan bütün yeniliklərə qarşıyıq. Onsuz da Azərbaycan cəmiyyəti bir inkişaf içərisindədir. Bu inkişaf da özünə lazım olan xətti tapacaq. Biz inkişaf deyəndə kosmopolit düşüncəni nəzərdə tutmuruq. Təşkilatımız milli dəyərləri unutmadan inkişafı, tərəqqini üstün hesab edən, elmə əsaslanan cəmiyyətin tərəfdarıdır. Belə təşkilatların çox olmasını istəyirik.

- Sizin fəaliyyət istiqamətlərinizə internet resurslar daxildir....

- Bu məqamı çox düzgün tutmusunuz. Bəzən bizə deyirlər ki, “İrəli” İctimai Birliyi hər yerdədir. Həm internet səhifələrində, həm mətbuatda. Bu təsadüfi baş verən proses deyil. Biz əvvəlcədən bütün bu məsələləri planlaşdırırıq. Əhatə etmək istədiyimiz hədəfləri düzgün seçməyə çalışırıq. Hesab edirik ki, əlaqə yaradacağımız kontingentə fikirlərimizi internet vasitəsilə də çata biləriksə, bunu həmin yolla edirik. Bu proseslər xaotik şəkildə baş vermir. İnformasiyaya zəmanəmizin ən dəyərli ünsürü kimi yanaşırıq. Proseslərə bu cür yanaşmaq 21-ci əsrin diktəsidir. ABŞ-ın bu istiqamətində fəaliyyətini misal olaraq göstərmək olar. Məsələn, bizim informasiya texnologiyaları layihəmiz var ki, bu proqram çərçivəsində 50 min insanı əhatə edə bilmişik.

- Bu şəkildə fəaliyyət göstərən digər təşkilatlar da mövcuddur. Amma internet resurslardan istifadə edərək, təbliğatını quran təşkilatların fəaliyyət istiqamətlərinə başqa məsələlər daxildir...

- Mən sizin nə demək istədiyinizi anladım. Gərək ideyaya saf və səmimi yanaşasan. İnanın ki, “İrəli” İctimai Birliyinə üzv olan gənclərin əsas ideyası Azərbaycandır. Bir məqamı yaddan çıxarmaq lazım deyil ki, Azərbaycan tarixdə heç bir zaman bu qədər müstəqil olmayıb. Prezident İlham Əliyev biz gənclərə çox gözəl bir platforma verib. Kimsə, bunları görmürsə, biz artıq heç nə edə bilmərik. Təbii ki, bu inkişafı və ya problemləri görən insanlarla addımlamaq istəyirik.

- Rəqibləriniz necə, çoxdur?

- Biz bu barədə ümumiyyətlə fikirləşmək istəmirik. Bizimlə bağlı tənqidləri təhlil edirik. Ancaq fəaliyyətimizi bu tənqidlərin ətrafında düşünməyə həsr edən təşkilat da deyilik. Hər şeyin bir norması var. Biz dayanmadan işləməyi qarşımıza məqsəd qoyan təşkilatıq.

- Yeri gəlmişkən, təşkilatınızın iqtidaryönlü olduğunu da deyirlər. Bunu necə qəbul edirsiniz?

- Ölkədə konstruktiv mövqedə olan təşkilatlar və şəxslər “İrəli” İctimai Birliyinin fəaliyyətini təqdir edir. Bu insanların içərisində bizə öz məsləhətlərini verənlər də var. “İrəli” İctimai Birliyi prezident İlham Əliyevi dəstəkləyən bir təşkilatdır. Kimsə hələ də ölkədəki inkişafı görmürsə, yetərsizlik sindromu yaşayırsa, öz kompleksinin girovuna çevrilibsə, artıq bizim onun mövqeyinə heç nə demirik. Dövlətin bir çox strukturları ilə yanaşı, dünyanın aparıcı şirkətləri ilə də səmərəli əməkdaşlıq edirik. Bizim üçün əsas olan layihə üzrə tərəfdaşı seçməkdir.

- Təşkilatınız gənc liderlərin formalaşması ilə bağlı bir sıra layihələr həyata keçirir. Bu proqramlarda iştirak edən gənclərin liderlik potensialını necə dəyərləndirirsiniz?

- Əslində lider anlayışı ambisioz bir anlayışdır. Yəni müxtəlif sahələrin müxtəlif liderləri ola bilər. Əslində yaxşı liderlik yaxşı məsuliyyət deməkdir. Biz məsuliyyətli vətəndaşlar yetişdirmək istəyirik. Həm də liderliyin məsuliyyət tərəfinə önəm verən gənclik yetişdirmək istəyirik.

- Burada söhbət ictimai-siyasi sahədə liderlikdən söhbət gedir. Məsələn, sizin hərəkat formalaşanda qurumun 6 təsisçisi var idi və hər biri də lider olmaq iddiası ilə meydana çıxmışdı.

- “İrəli” İctimai Birliyinin məqsədi gəncləri müasir cəmiyyətə hazırlamaqdır. Təşkilatdan çıxıb, kənarda nə qədər bacarıqla fəaliyyət göstərirlərsə, mən bunu “İrəli”nin uğuru hesab edirəm. Əslində, ictimai təşkilatların funksiyası insanlara liderlik bacarığını aşılamaqdır. Digər tərəfdən mənim təşkilatın sədri olmağım, hələ o demək deyil ki, mən onlardan daha yaxşıyam. Bizim təşkilatda kifayət qədər bacarıqlı gənclər fəaliyyət göstərir.

- Ancaq səmimi yanaşsaq, görərik ki, ictimai həyatda gənc liderlərin sayı o qədər də çox deyil...

- Xeyr, kifayət qədər liderlər var. Burada bir məsələ var - biz yalnız bir-birimizə kömək etməliyik. Azərbaycan cəmiyyəti nə qədər bir olsa, bir o qədər problemlər həll edilər. Ən çox sevmədiyim məsələ təşkilatların bir-birinə qısqanc yanaşmasıdır. Bizim məqsədimiz isə hamıya kömək etməkdir.