Daxili siyasət

Ana səhifə

Daxili siyasət

Dağlıq Qarabağdan olan məcburi köçkünlərin forumu keçirilib

15 yanvar 2010 12:52 (UTC +04:00)

Bakı. Elnur Məmmədli – APA. Bakıda Dağlıq Qarabağdan olan məcburi köçkünlərin forumu keçirilib. APA-nın məlumatına görə, Qarabağ Azadlıq Təşkilatının keçirdiyi forumda Dağlıq Qarabağın müxtəlif rayonlarından olan nümayəndələr iştirak edib.

QAT sədri Akif Nağı çıxışında bildirib ki, Cənubi Qafqazda gedən geosiyasi oyunlar çərçivəsində Ermənistanın maraqları tam təmin edilir: “Çalışırlar ki, Qarabağ problemini hansısa formada həll etsinlər. Ortaya qoyulan variantların heç biri Azərbaycanın maraqlarına cavab vermir”. A. Nağının fikrincə, proseslər indiki axarı ilə getsə, Ermənistanın işğal etdiyi torpaqları boşaltması məsələsi gündəlikdən tam çıxa bilər. Təşkilat sədri bu məsələdə Qarabağ əhalisinin istəyinin həlledici olduğunu vurğulayaraq onların mövqeyinin ortaya qoyulmasına ehtiyac yarandığını söyləyib: “Bu gün Rusiya deyirsə ki, “Dağlıq Qarabağ xalqının mövqeyi olmadan bu problem həll edilə bilməz”, ABŞ da öz növbəsində Dağlıq Qarabağ ermənilərinə maliyyə yardımını davam etdirirsə, biz düşünməliyik. Belə bir məqamda bütün iş Azərbaycan ordusuna qalır. Problem yalnız müharibə yolu ilə həll oluna bilər”.

Millət vəkili Aqil Abbas isə çıxışında xatırladıb ki, rus torpaqlarının faşistlərdən təmizlənməsi üçün Azərbaycan 400 min şəhid verib: “Amma öz müharibəmizdə 25 min şəhid vermişik, deyirik ki, “yaman çox şəhidimiz var”. Elə rayonlar var ki, Rusiyada öldürülən oğullarının sayı Qarabağda ölənlərin sayından çoxdur”.

Forumda Qarabağın ayrı-ayrı rayonlarından, qəsəbə və kəndlərindən olan şəxslər münaqişənin həlli ilə bağlı öz təkliflərini səsləndiriblər. Qərara alınıb ki, irəli sürülən təkliflər ümumiləşdirildikdən sonra vahid bir sənəd hazırlansın və müvafiq qurumlara təqdim edilsin.