Daxili siyasət

Ana səhifə

Daxili siyasət

Müsavat Partiyası qurultayı 2010-cu ilin dekabrında keçiriləcək

16 yanvar 2010 11:46 (UTC +04:00)

Bakı. Elnur Məmmədli - APA. Bu gün Müsavat Partiyası Məclisinin iclası keçirilib. APA-nın məlumatına görə, toplantıda partiya başqanı İsa Qəmbər Tofiq Yaqublunu partiya başqanının müavini təyin etmək təklifini irəli sürüb və qərar qəbul edilib. Partiya başqanı bu il ərzində özünə bir neçə müavin təyin edəcəyini qeyd edib.

Partiyanın Mərkəzi İcra Aparatının rəhbəri Arif Hacılı 23 dekabr bələdiyyə seçkilərinin nəticələri ilə bağlı çıxış edib. A. Hacılının çıxışından sonra Məclisin bələdiyyə seçkiləri ilə bağlı yekun qərarı qəbul edilib. Qərarda bələdiyyə seçkilərinin nəticələrinin Müsavat Partiyası tərəfindən tanınmadığı bildirilir. Partiya seçkilərin nəticələrinin ləğv edilməsini, qanunvericilikdə bələdiyyələrin səlahiyyətlərinin genişləndirilməsini, yeni bələdiyyə seçkilərinin keçirilməsini, seçkiöncəsi şəraitin demokratikləşdirilməsini tələb edib.

Müsavat Məclisinin sədri Sülhəddin Əkbər bu il Azərbaycanda parlament seçkilərinin keçiriləcəyini bildirib. Bununla bağlı Divanda müzakirələrin aparıldığını və ilkin fikrin partiyanın qurultayının parlament seçkilərindən sonra keçirilməsinin təklif edildiyini qeyd edib: «Bu qurultayda Nizamnaməyə dəyişiklik edilməsə, İsa Qəmbər partiya başqanlığına namizədliyini irəli sürə bilməyəcək».

Çıxış edən Məclisin bəzi üzvləri qurultayın 2011-ci ilə saxlanılması təşəbbüsü ilə çıxış edib. Onlar parlament seçkiləri ilə partiyanın qurultayı arasında zamanın az olduğunu və bu iki prosesin bir-birinə mane olacağını bildiriblər.

İsa Qəmbər isə bildirib ki, bu məsələnin müzakirəsinə vaxt itirməyə ehtiyac yoxdur: «Mən hətta düşünürdüm ki, qurultayı seçkilərdən əvvəl keçirək və partiya seçkilərdə yeni rəhbərliklə iştirak etsin. Amma Divan üzvləri belə qərara gəliblər ki, seçkilərdən sonra qurultay keçirilsin. Partiyanın başqanlığı ilə bağlı məsələyə gəldikdə, bu məsələ mən necə deyirəmsə, elə də olacaq. Bu məsələyə vaxt itirməyə dəyməz».

Müzakirələrdən sonra qəbul olunmuş qərarda partiyanın qurultayının 2010-cu ilin dekabr ayında keçirilməsi nəzərdə tutulub.

İsa Qəmbər bu il Azərbaycanda keçiriləcək parlament seçkiləri ilə bağlı çıxış edib. O, bəzi partiyaların rəhbərlərinin müxalifətin vahid koalisiyada çıxış etməsi təşəbbüsünü irəli sürdüyünü deyib: «Bu gözəl şüardır. Amma bu qüvvələrin biri İran, biri Moskva, biri hakimiyyət tərəfindən idarə olunursa, vahid koalisiya necə baş tuta bilər? Digəri bildirir ki, partiyaların böyük-kiçik olması söhbətini kənara qoymaq lazımdır. Kiçik partiyalar, heç bir prinsipiallıq göstərməyən qurumlar həlledici məqamda demokratik qüvvələr üçün yeni-yeni problem yaratmağı bacarırlar. Başqa bir həmkarımız deyir ki, məhz bu partiyalar müxalifət hesab olunmalıdır. Müsavat Partiyası real müxalifət qüvvələrinin birliyinin tərəfdarıdır. Son illərin təcrübəsi göstərir ki, Müsavat Partiyası harada olursa, orada uğur olur. 2003-cü ildə bir neçə özündən deyən partiyalar bloklar yaratdılar, amma hansı nəticəyə nail oldular?».

İsa Qəmbər bildirib ki, parlament seçkilərində Müsavat Partiyasının əsas məqsədi hər bir seçki dairəsindən güclü namizəd irəli sürmək olacaq.