Daxili siyasət

Ana səhifə

Daxili siyasət

YAP İdarə Heyətinin növbəti iclası keçirilib

29 yanvar 2010 14:15 (UTC +04:00)

Bakı. Elnur Məmmədli – APA. Yeni Azərbaycan Partiyası (YAP) İdarə Heyətinin növbəti iclası keçirilib. Partiyanın mətbuat xidmətindən APA-ya daxil olan məlumata görə, iclasda YAP-ın 2009-cu ildə fəaliyyəti, qazanılmış uğurlar və qarşıda duran vəzifələr haqqında fikir mübadiləsi aparılıb. İclasda YAP-ın ölkənin ictimai-siyasi həyatının, o cümlədən prezident İlham Əliyevin davam etdirdiyi islahatlar və quruculuq proseslərinin ən yaxın iştirakçısı olduğu qeyd olunub. Dövlət başçısının partiyanın IV qurultayındakı nitqində irəli sürülən tezislərin və qarşıya qoyulan vəzifələrin gələcək fəaliyyətin müəyyənləşdirilməsində həlledici istiqamət olduğu bir daha vurğulanıb.

İclasda YAP İdarə Heyətinin 2009-cu ildə fəaliyyəti ilə bağlı hesabat, o cümlədən Gənclər Birliyinin və Qadınlar Şurasının 1 yanvar 2010-cu ilə olan statistik hesabatı və 2009-cu il üçün maliyyə hesabatı dinlənilərək təsdiqlənib. Statistik məlumata əsasən 2009-cu ildə partiyaya 29 777 nəfər üzv qəbul olunub və 2010-cu il yanvar ayının 1-nə YAP üzvlərinin ümumi sayı 498 462 nəfərə çatıb. Partiya sıralarında gənclərin xüsusi çəkisi getdikcə artır. 2009-cu ildə YAP-a üzv qəbul olunanların 49,7 faizini gənc nəslin nümayəndələri təşkil edib. Bütövlükdə partiya üzvlərinin 39,3 faizini, yəni 196 340 nəfərini gənclər, 43,5 faizini, yəni 217 243 nəfərini isə qadınlar təşkil edir.

İdarə Heyətinin iclasında partiyanın maliyyə hesabatı müzakirə edilərək təsdiqlənib. Hesabatda bildirilir ki, 2009-cu ildə partiyanın üzvlük haqlarından mədaxili 2 milyon 915 min 505 manat təşkil edib. Hesabat ilində partiyanın ümumi xərcləri 2 374 176 manat olub ki, bunun da 1 milyon 426 min 587 manatını YAP-ın icra katibliyində, şəhər və rayon təşkilatlarında çalışan əməkdaşların əməkhaqqı fondu təşkil edib. 324 min 107 manat partiya tədbirlərinin maliyyələşməsinə və ezamiyyə xərclərinə, 33 min 290 manat partiya vəsiqələrinin hazırlanmasına, 190 min 453 manat inventar və dəftərxana ləvazimatlarının alınmasına, 106 min 376 manat cari təmir və özəlləşdirmə xərclərinə, 172 min 089 manat kommunal xərclərə, bank və rabitə xidmətlərinə, 93 min 995 manat avtomobillərə texniki xidmətə, 12 428 manat həmkarlar ittifaqlarına ödənişə sərf olunub. Digər xərclər 14 min 851 manat olub. 541 min 329 manat partiyanın mərkəzi və yerli təşkilatlarının hesabında qalıb.

İclasda həmçinin İdarə Heyətinin 2010-cu il üçün iş planı təsdiq edilib.