Daxili siyasət

Ana səhifə

Daxili siyasət

Milli Məclisdə Daşkəsəndəki “N” saylı hərbi hissədə baş verən hadisə müzakirə olunub

01 fevral 2010 10:17 (UTC +04:00)

Bakı. Elbrus Seyfullayev - APA. Milli Məclisin bugünkü iclasında Daşkəsən rayonunda yerləşən hərbi hissədə baş verən faciəli hadisə müzakirə olunub. APA-nın xəbərinə görə, iclasda çıxış edən deputat İqbal Ağazadə baş verən hadisə ilə bağlı müdafiə nazirinin Milli Məclisə çağırılmasını tələb edib. Onun sözlərinə görə, Daşkəsəndə baş verən hadisə mahiyyət etibarı orduda vəziyyətin neqativ olduğunu göstərir: “Azərbaycan ordusu dövlətin qarantıdır. Bu sahəyə ciddi nəzarət olunmalıdır. Dəfələrlə belə hadisələr baş verib. Bu, bütün vətəndaşları narahat edir”.

Deputat İkram İsrafil orduda baş verən son hadisənin hamını sarsıtdığını bildirib. Millət vəkili hadisə yerinə deputat nümayəndə heyətinin ezam olunmasını təklif edib: “Bu korpusda baş verən hadisələrlə bağlı ciddi islahatlara ehtiyac var”.

Millət vəkili Siyavuş Novruzov hərbi hissədə baş verən hadisəni şişirtməməyə çağırıb: “Bu hadisə ilə bağlı prokurorluqda təhqiqat aparılır. Təhqiqatın nəticələri ilə bağlı cəmiyyətə məlumat veriləcək. İndi orduya böyük maraq var. Vaxtı ilə ordudan yayınan insanlar ərizə ilə müraciət edirlər ki, əsgərliyə getmək istəyirik. Hər dəfə baş verən hansısa hadisə ilə bağlı Müdafiə Nazirliyinin hansısa qurumunun hesbatını tələb eləmək düzgün deyil. Onlar Ali baş komandan qarşısında məsuliyyət daşıyırlar”.

Milli Məclis sədrinin birinci müavini, parlamentin müdafiə və təhlükəsizlik komitəsinin üzvü Ziyafət Əsgərov Daşkəsəndəki hərbi hissədə baş verən hadisənin hamını narahat etdiyini, bunula bağlı ciddi iş görüldüyünü deyib: “Mən bu hadisədən sonra nazirlə danışdım. Hadisə yerinə komisisya gndərilib. Bu hadisə ilə bağlı ciddi tədbirlər görüləcək”

Spiker Oqtay Əsədov da baş verən hadisə ilə bağlı istintat qrupunun yaradıldığını, cəmiyyətə əlavə məlumat veriləcəyini deyib.