Daxili siyasət

Ana səhifə

Daxili siyasət

MM sədrinin birinci müavini: Proporsional seçki sisteminin bərpa olunmasına ehtiyac yoxdur

01 fevral 2010 10:37 (UTC +04:00)

Bakı. Elbrus Seyfullayev - APA. Mili Məclisin yaz sessiyasının ilk iclasında millət vəkilləri bir sıra təkliflərlə çıxış ediblər. APA-nın xəbərinə görə, iclasda çıxış edən millət vəkili Cəmil Həsənli Azərbaycanda “Neft haqqında” qanunun qəbul olunması təklifini irəli sürüb. Deputat, həmçinin yeni tikilən binaların qazla təmin olunmasının zəruri olduğunu deyib.

Millət vəkili Mübariz Qurbanlı “İşğal altındakı ərazilər haqqında” qanunun qəbul olunmasını təklif edib. Onun sözlərinə görə, bu qanunla işğal olunan ərazilərin statusu müəyyən edilməlidir: “Bu qanunun qəbulu çox vacibdir. İşğala məruz qalan ölkələrin çoxu belə bir sənədi qəbul ediblər”.

Deputat Pənah Hüseyn parlamentdə Dağlıq Qarabağla bağlı məsələnin müvafiq icra hakimiyyətlərinin iştirakı ilə müzakirəsinin təşkil olunması təklifini irəli sürüb. O, həmçinin Amnistiya elan olunmasının və həbsdə olan jurnalistlərin azadlığa buraxılmasının vacibliyini qeyd edib: “Bu günlərdə deputat Cəlal Əliyev “Yeni Müsavat” qəzetinin baş redaktorunun müavini Azər Ayxanı məhkəməyə verib. Jurnalistlərin həbsinin qarşısı alınmalıdır”.

Millət vəkili Qüdrət Həsənquliyev həmkarı Mübariz Qurbanlının qaldırdığı məsələni dəstəklədiyini deyib. Deputat, həmçinin Azərbaycan Silahlı Qüvvələrindəki vəziyyətlə bağlı məsələnin Milli Məclisdə müzakirəsinin vacib olduğunu deyib.

Deputat İkram İsrafil Seçki Məcəlləsinə əlavə və dəyişikliklərlə bağlı layihəni parlamentə təqdim etdiklərini, bu sənədin müzakirəyə çıxarılmasının zəruri olduğunu bildirib: “Biz həmçinin təklif edirik ki, proporsional seçki sistemi bərpa olunsun”.

Deputat Siyavuş Novruzov isə həmkarına cavab verərək qüvvədə olan Seçki Məcəlləsinin tam normal olduğunu, hər hansı dəyişikliyə ehtiyac görmədiklərini deyib.

MM sədrinin birinci müavini Ziyafət Əsgərov deyib ki, proporsional seçki sistemi ilə bağlı məsələni indi yox, referendum zamanı qaldırmaq lazım idi: “Buna ehtiyac yoxdur. Düzdür, çoxlu partiyalar var. Amma bu proses hələlik klassik sistem formasina gəlib çatmayib. Niyə majoritar sistemdən qorxursunuz?”

Z. Əsgərov həbsdə olan jurnalistlərin azadlığa buraxılması tələbinə də toxunub: “Jurnalistlər də digər vətəndaşlar kimi qanun qarşısında bərabərdir. Hər kəs tötrətdiyi əmələ görə məsuliyyətə cəlb olunmalıdır. İndi deputatın şərəf və ləyaqəti tapdanıb. O, nə etsin? Bu məsələnin sivil həlli yolu məhkəməyə müraciət etməkdir. Cəlal müəllimin mənim vəkilliyimə ehtiyacı yoxdur, onun vəkili var. Ancaq götürüb etibarlı mənbə adı ilə nə gəldi yazırlar”.

Milli Məclisin spikeri Oqtay Əsədov da “Diffamasiya haqqında” qanunun qəbul olunması ilə bağlı səslənən təkliflərə münasibət bildirib: “Bu qanun Avropa ölkələrinin çoxunda qəbul olunmayıb”.

Milli Məclis