Daxili siyasət

Ana səhifə

Daxili siyasət

Azərbaycan Prezidenti: “Biz heç bir xarici yardıma möhtac deyilik”

12 fevral 2010 22:20 (UTC +04:00)

APA-nın “Azərtac”a istinadən verdiyi xəbərə görə, prezident Heydər Əliyev Mərkəzinin binasının Göyçaya əlavə yaraşıq verən gözəl, yeni bir memarlıq nümunəsi olduğunu deyib.

Mərkəzdəki şəkillərin, eksponatların müasir Azərbaycanın tarixini əks etdirdiyini deyən ölkə başçısı “bugünkü Azərbaycanın uğurlu inkişafının təməli məhz 1970-ci illərin əvvəllərində qoyulub. O vaxta qədər Azərbaycan Sovet İttifaqının tərkibində demək olar ki, ən geridə qalmış respublika idi. Azərbaycanı tanımırdılar. Azərbaycanda demək olar ki, sənaye potensialı yox idi. Respublikanın perspektivləri də o qədər aydın deyildi. 1970-ci illərdən başlayaraq Heydər Əliyevin zəhməti hesabına Azərbaycan dirçəldi, inkişaf etdi. Demək olar ki, qısa müddət ərzində, yəni 13-14 il ərzində Azərbaycan o vaxt Sovet İttifaqının tərkibində ən inkişaf etmiş respublikaya çevrildi. O vaxt cəmi iki respublika özünü təmin edə bilirdi. Onlardan biri də Azərbaycan idi. Yəni, bu onu göstərir ki, ulu öndərin bütün dövrlərdəki fəaliyyəti xalqa xidmət etməkdən ibarət olub” deyə, bildirib.

Prezident tarixin sonrakı mərhələsinə də toxunub: “Əfsuslar olsun ki, xalqımız üçün ən çətin anlarda, Sovet İttifaqının dağılması ərəfəsində ölkəyə rəhbərlik etmiş insanlar öz vəzifə borclarını lazımi səviyyədə yerinə yetirə bilmədilər. Azərbaycan çox ağır vəziyyətlə üzləşmişdi. Demək olar ki, bütün iqtisadiyyat dağılmışdı, sənaye potensialı məhv edilmişdi, ölkədə hərc-mərclik, xaos, anarxiya, vətəndaş müharibəsi. Bütün o hadisələri biz yaxşı xatırlayırıq. Yenə də Azərbaycan xalqı öz rəhbərinə üz tutdu, Heydər Əliyevi hakimiyyətə dəvət etdi və 1993-cü ildən 2003-cü ilə qədər Azərbaycan bütün çətin sınaqlardan uğurla çıxa bildi. Həm vətəndaş müharibəsi dayandı, həm iqtisadi tənəzzülün qarşısı alındı, həm də inkişaf yoluna qədəm qoyduq. On il ərzində demək olar ki, ölkəmiz öz siyasi və iqtisadi potensialının gücləndirilməsi nəticəsində dünya miqyasında çox böyük hörmətə malik olan bir ölkəyə çevrildi”.

Hazırda da Heydər Əliyev siyasətinin davam etdirildiyini bildirən dövlət başçısı bunu uğurların əsas şərti, amili adlandırıb: “Son 6 ildə Azərbaycan böyük və uğurlu yol keçib. Ancaq bu yol əlbəttə ki, bu vaxta qədər qoyulmuş möhkəm təməl əsasında öz yerini tapıb. Bu gün Azərbaycan dünya miqyasında sürətlə inkişaf edən ölkədir, öz problemlərini özü həll etməyə qadirdir. Biz heç bir xarici yardıma möhtac deyilik. Baxmayaraq ki, bu gün dünyanın hətta aparıcı ölkələri beynəlxalq maliyyə yardımı olmadan öz iqtisadi inkişafını təmin edə bilmirlər. Nəinki MDB məkanında, hətta Avropada elə ölkələr var ki, onlar dərin böhran içindədirlər. Bu böhran hamımız üçün bir sınaq olub. Azərbaycan öz hesabına, öz xalqının zəhməti ilə, aparılan düşünülmüş siyasətlə, islahatlarla bu sınaqdan şərəflə çıxdı. 2009-cu il gözəl bir göstərici ili oldu. Kim nəyə qadirdir, kim öz hesabına yaşaya bilər, kim uğurla inkişaf edə bilər, kim ancaq xaricdən gələn yardımlar hesabına öz imkanlarını təmin edə bilər. Biz o nadir ölkələrdənik ki, öz hesabımıza yaşayırıq və yaxşı da yaşayırıq”.

2009-cu ildə nəzərdə tutulmuş bütün layihələrin icra edildiyini deyən prezident həm sosial, həm iqtisadi, həm sənaye layihələrinin davam etdiyini bildirib: “Ölkəmiz üçün ağır illər arxada qaldı. Bizim qarşımızda bütün yollar açıqdır. Biz ancaq və ancaq irəliyə getməliyik. Ancaq ölkəmizi daha da gücləndirməliyik və bunu da edirik. 2009-cu ildə dünya miqyasında ən sürətlə inkişaf edən ölkə Azərbaycan olub, bu, artıq reallıqdır. Bunu biz nə enerji resurslarının hesabına etmişik, nə də ki, xarici yardımlar hesabına. Hamımız bilirik ki, 2009-cu ildə neftin qiyməti kəskin şəkildə aşağı düşdü. İqtisadiyyatımızın böyük hissəsi enerji resurslarının üzərində qurulub. Ancaq buna baxmayaraq, biz başqa imkanları səfərbər etdik, bütün resursları cəmləşdirə bildik və bu vaxta qədər aparılan islahatlar öz bəhrəsini verdi. Regionların inkişafı davam etdi, bütün layihələrin icrası davam etdirildi.
2009-cu ildə iqtisadiyyatımız ən yüksək templərlə artıb. 2010-cu ilin birinci ayının yekunları da çox ümidvericidir. Yenə də Azərbaycan dünya miqyasında birinci sıradadır. Bizim iqtisadiyyatımız bu ilin birinci ayında 9 faizdən çox artıb”.

Ölkədə yoxsulluq şəraitində yaşayanların sayının təxminən 11 faiz olduğunu deyən prezident bunun dünyanın inkişaf etmiş ölkələri üçün də məqbul rəqəm olduğunu qeyd edib.

Regionların sosial-iqtisadi inkişafı Dövlət Proqramının ikinci mərhələsi uğurla icra edildiyini bildirən ölkə başçısı 2013-cü ilə qədər bu proqramın uğurlu icrasına nail olacağımıza əminliyini ifadə edib.

Prezident səfər etdiyi Göyçay rayonunun iqtisadi potensialının 2003-2008-ci illərdə 3 dəfədən çox artdığını bildirib.