Daxili siyasət

Ana səhifə

Daxili siyasət

Əvəz Temirxan İsa Qəmbərin Lalə Şövkətə qarşı ittihamlarının səbəbini açıqlayıb

15 fevral 2010 14:03 (UTC +04:00)

Bakı. Elnur Məmmədli - APA. Azərbaycan Liberal Partiyası (ALP) “Ölkə” qəzeti ilə bağlı məhkəmə iddiası qaldıracaq. Partiyanın sədr əvəzi Əvəz Temirxan APA-ya açıqlamasına bildirib ki, buna səbəb qəzetdə dərc olunmuş ““Madam” ləqəbli KQB agenti” başlıqlı yazıdır. Yazıda ALP lideri Lalə Şövkət KQB agenti kimi təqdim edilib. Ə. Temirxan bu yazının arxasında Müsavat Partiyasının başqanı İsa Qəmbərin durduğunu iddia edir: “Ömürlük laborant İsa Qəmbər əvvəllər başqalarının əsərlərini öz adına çıxırdı, indi isə uğursuz siyasətçi kimi “öz əsərlərini” başqalarının adına çıxır. Yarımçıq laborant professor Lalə Şövkətə çamur atır. Səbəbi isə odur ki, 1998-ci ildə Lalə Şövkət prezidentliyə namizəd kimi “Elçibəyçi” İsa Qəmbəri yox, bir ağsaqqal kimi Elçibəyi müəyyən şərtlərlə vahid namizəd kimi dəstəkləyəcəyini bəyan etdi. İsa Qəmbər isə Elçibəyi dəstəkləmədi və bu mövqeyinə görə müxalifət seçkilərə getmədi”.

Ə. Temirxanın sözlərinə görə, İ. Qəmbər xarici ölkələrin diplomatları, siyasətçiləri və beynəlxalq təşkilatların nümayəndələri ilə keçirdiyi görüşlərdə Lalə Şövkətlə bağlı yanlış məlumatlar verir, onu Rusiyanın adamı kimi təqdim edir: “Hətta bəzi diplomatlar da bunu bizə deyiblər. Bu adam diplomatlarla görüşünü “Lalə Şövkət Rusiyanın adamıdır” ifadəsi ilə başlayıb? bu ifadə ilə də qurtarır. Bunun üçün o saatlarla səfirliklərin qapısında gözləyir. Lalə Şövkət müxalifətin seçkilərə birgə getməsinin tərəfdarıdır. İsa Qəmbər isə “Azadlıq” blokunu parçalamaq, AXCP-ni, KXCP-ni öz tərəfinə çəkmək və “Burada lider mənəm” imicini yaratmaqla iqtidarla mandat sövdələşməsinə getmək istəyir. O, beynəlxalq təşkilatların nümayəndələri ilə görüşdə yalvarır ki, gedin hakimiyyətlə danışın, Müsavat Partiyasına daha çox yer versin. Agent olmağa gəldikdə, psixologiyada öz təsdiqini tapmış bir fikir var ki, vərəm xəstəsi hamını vərəmə yoluxdurmaq istədiyi kimi, agentlər də öz agentliyini gizlətmək üçün başqalarına agent damğası vurmağa çalışırlar.

“Yeni Müsavat” qəzeti ilə bağlı məhkəmə iddiasının qaldırılmasına gəldikdə, Ə. Temirxan bildirib ki, ALP lideri Lalə Şövkət buna ehtiyac görməyib: “O məsləhət görüb ki, bu məsələni məhkəməyə müraciət etmədən öz aramızda həll edək. Əgər bu qəzet mənimlə müzakirəyə hazırdırsa və dərc etdiyi məlumatlarla bağlı ortaya sübutlar qoyarsa, o zaman mən siyasətdən getməyə hazıram. Əgər ortaya sübut qoya bilmirsə, o zaman üzrxahlıq etsin”.

Qeyd edək ki, “Yeni Müsavat” qəzeti 1993-cü ildə Rusiya və İranın Azərbaycanda dövlət çevrilişi planı hazırladığını, bu planda Ə. Temirxanın da yer aldığını yazıb.