Daxili siyasət

Ana səhifə

Daxili siyasət

Mirmahmud Mirəlioğlu: “Lalə Şövkətdən üzr istəyirəm” – MÜSAHİBƏ

Mirmahmud Mirəlioğlu: “Lalə Şövkətdən üzr istəyirəm” – <font color=red>MÜSAHİBƏ</font>

16 fevral 2010 13:27 (UTC +04:00)

Bakı. Elnur Məmmədli – APA. Klassik Xalq Cəbhəsi Partiyasının (KXCP) sədri Mirmahmud Mirəlioğlunun APA-ya müsahibəsi:

- Müsavat Partiyası Demokratiya Uğrunda İttifaqın parlament seçkiləri ilə bağlı birgə toplantı keçirmək təklifini qəbul edib. Bundan sonrakı addım nə olacaq?

- Bu məsələ ilə bağlı Müsavat partiyasının Divanında qərar qəbul olunandan sonra İsa bəy bu barədə bizi məlumatlandırdı, biz də ona təşəkkür etdik. Bu qərarı təqdir edirik. Ona görə ki, bəzi bədgüman dostlarımız bu təklifi geri çəkməyi istəyirdilər. Amma bunlara baxmayaraq, biz səbirlə gözlədik, Müsavat da sağ olsun ki, təklifi qəbul etdi. Növbəti addım isə nəzərdə tutulduğu kimi, 2010-cu il parlament seçkilərində necə iştirak etmək məsələlərini bir yerdə müzakirə etmək və daha kimlərlə bir yerdə ola bilərik məsələlərini müəyyənləşdirməkdir. Hər halda biz addım-addım bu istiqamətdə irəliləməyə çalışacağıq. Bu təkcə bizim təklifimiz deyil, sosial bir sifarişdir. Buna nail olmaq fikrindəyik.

- Pənah Hüseyn müxalifətin seçkilərdə birgə iştirak ilə bağlı müəyyən partiyaların adlarını çəkib. Bu DUİ-nin təklifidirmi?

- Xeyr. DUİ-nin bu məsələdə təşəbbüsü bundan ibarətdir ki, “Azadlıq” bloku, Müsavat Partiyası və DUİ-nin birgə müzakirələri aparılsın. Heç kimdə də bədgümanlıq, narahatlıq yaranmasın deyə, bu qurumlarla bir yerdə ilk toplantımızda təkliflərin ortaya çıxmasını istəyirik.

- Bəs nəyə görə məhz bu üç qurum seçilib?

- Əslində, Azərbaycanda olan çeşidli, rəngarəng müxalifətin bütün nümayəndələrinin hamısı bizim müzakirələrimizdən keçib. Mübahisəsiz bu üç qurum qəbul edilib. Digər təkliflər də olub, amma keçməyib, yəni hamı səs verməyib. Biz həm də hesab edirik ki, növbəti görüşlərimizdə həmin partiyaların da adları çəkilə bilər, müzakirə olunar. Bu məsələlərə hamımız bir yerdə baxacağıq.

- Yəni sonrakı mərhələdə digər partiyaların da bu müzakirələrə qoşulması mümkündürmü?

- Bu tamamilə başqa məsələdən asılıdır. Yəni digərlərinin adından danışa bilmərəm, bu müzakirələr nəticəsində ortaya çıxacaq təkliflərdən asılı ola bilər.

- “Azadlıq” bloku Sizin təklifinizə hər hansı cavab veribmi?

- Şəxsən mən tələsməyin tərəfdarı deyiləm. Ola bilsin, adamlar toplaşa bilmirlər, ola bilər toplaşırlar. Müxtəlif informasiya və mülahizələr var. Bütün bunlardan asılı olmayaraq gözləyirik. Biz onların əvəzinə qərar qəbul edə bilmərik.

- Müsavat Partiyası parlament seçkilərində hər seçki dairəsindən güclü namizəd irəli sürmək təklifi ilə çıxış edib. Bu təklifə münasibətiniz necədir?

- Ümumiyyətlə, bütün seçkilərdə müxalifət çalışıb ki, seçkilərdə güclü namizədlə iştirak etsin. Bu bir aksiomadır, bu indi də belə olmalıdır.

- Siz müxalifətin seçkilərə birgə getməsi təşəbbüsünü irəli sürmüsünüz, amma hazırda müxalifət daxilində qarşıdurma başlayıb. Bu, bir-birinə zidd olan prosesləri necə qiymətləndirirsiniz?

- Mən müxalifət düşərgəsində qarşıdurmanın olduğunu düşünmürəm. Müxalifət olan, bu və ya digər müstəvidə bir yerdə olan həmfikir şəxslər arasında qarşıdurma olmamalıdır. Əgər belə qarşıdurma varsa, bu o deməkdir ki, onlar bir düşərgədə deyillər.

- Amma hazırda qarşı duran tərəflər illərdir müxalifət mövqeyindən çıxış edirlər...

- Mən bu barədə fikrimi dedim. Bu məsələyə öz subyektiv fikirlərimlə müdaxilə etmək istəmirəm.

- Ümumiyyətlə, bu proses müxalifətə hər hansı zərər verirmi?

- Hətta insanın özünün nəfəs alması belə zərərlidir. Çünki bu, hər an ölümə doğru bir addımdır. İstənilən məsələdə isə zərər də, xeyir də tapmaq mümkündür. Bu həmin məsələləri araşdıranın necə axtarmasından asılıdır.

- Bu qarşıdurmalar İsa Qəmbərin agent məsələsi ilə bağlı çıxışından sonra başladı...

- Bu mövzu kifayət qədər gecikib, yaşın bu vaxtında, ilin bu çağında bu mövzuda danışmağın doğru olmadığını düşünürəm. Eyni zamanda hər kəs öz dediyinə cavabdehdir. Ola bilsin, kimsə bu məsələni bu gün aktual sayır, ola bilsin biz bir az sonra aktual sayarıq. Bu məsələdə hər kəsin subyektiv fikirləri var. Amma bütün hallarda bu məsələ işin xeyrinə deyil. Bunu o zaman deyirlər ki, birdəfəlik qırılırlar. Amma axı indi seçki ilidirsə və bu, qarşı tərəfə kifayət qədər bəhanə verirsə, bizə qarşı, müxalifətə qarşı total səfərbərliyə səbəb olursa, bunun xeyri nədir?

- Müxalifət daxilində xarici dövlətlərin xüsusi xidmət orqanlarına çalışan şəxslərin olduğunu düşünürsünüzmü?

- Olmamış olmaz. Amma bu mənim mövzum deyil, heç İsa bəyin də sahəsi deyil. Birdən-birə nə baş verdi, bilmirəm.

- “Ölkə” qəzetində Lalə Şövkətlə “Madam” adlı agent kimi təqdim edildi. Sizə yaxın hesab olunan bu qəzetdə belə bir yazının dərc olunmasını necə izah edərdiniz?

- “Ölkə” qəzetində yazılanlarla bağlı narahatçılığı başa düşmürəm, xüsusilə də kənardakıların narahatlığını... Üstündən bir neçə gün keçəndən sonra “Yeni Müsavat” qəzetinin bunu aktuallaşdırması təəssüf doğurur. Digər tərəfdən, bəzi adamların narahatlığı var və bu, başa düşüləndir. Xüsusilə də, Əvəz Temirxanı qeyd etmək istərdim. Mən bu məsələdə tutduğu mövqeni ona yaraşdırmıram. “Ölkə” qəzetini bizim adımızla bağlayırlar, amma bu, qəzet müstəqildir. Məni tanıyanlar bilirlər ki, demokratiyaya, söz azadlığına münasibətim necədir və mənə yaxın olmayan Azərbaycan mətbuatı yoxdur. Bu, birmənalı belədir. Lalə xanımla bağlı “Ölkə” qəzetində gedən məqalə ilə bağlı mən bu məsələni işləyib hazırlayanların əvəzinə, oxucu kimi də, Mirmahmud kimi də Lalə xanımdan üzr istəyirəm. Hesab edirəm ki, bu çox yaramaz, məsələyə dəxli olmayan məsələdir. Kimin nə olmağı, necə olmağı bütün cəmiyyətdə var. Bu məsələnin qəzetdə necə yazılmasından asılı olmayaraq, kimin onu necə şişirtməsindən asılı olmayaraq, Lalə xanımı hər kəs tanıyır. Hesab edirəm ki, xanımın haqqında hörmət və ehtiramla danışmaq, düşmənçilik edəndə də bunu normal etmək lazımdır. Şübhəsiz burada iki məqam var və biz bunu araşdırırıq. Bu məqam ondan ibarətdir ki, bu məsələdə iqtidarın da, müxalifətin də rolu ola bilər. Bununla bağlı araşdırma aparırıq. Bundan faciə düzəltmək lazım deyil. Bu, əslində DUİ-nin başladığı işə zərbə vurmaqdır, başqa şey deyil.

- Bu məqalədə yazılanların həqiqətə yaxınlığı varmı?

- Bunun həqiqət olub-olmadığını bilmirəm. Bu məsələnin “Ölkə” qəzetində yazılmasını böyük ayıb sayıram. Hesab edirəm ki, bu, doğru deyil. Kimsə bundan tiraj qaldırmaq, satış əldə etmək istəyirlərsə, kimsə hesab edirsə ki, artıq bununla müxalifətin birliyinə zərbə vurdu, yanılır.

- Siz burada iqtidarın da rolunu istisna etmirsiniz. Amma bu məsələni əvvəlcə İsa Qəmbər gündəmə gətirib. Burada da iqtidarın rolunun olduğunu düşünürsünüz?

- Mən bu məqalənin hazırlanmasında iqtidar təmsilçilərinin rolunun olduğunu deyirəm, lakin müxalifətin əlinin olduğunu da istisna etmirəm.