Daxili siyasət

Ana səhifə

Daxili siyasət

AMEA İnsan Haqları İnstitutunda “XX əsrdə ermənilərin azərbaycanlıları qarşı törətdikləri kütləvi cinayətlər” mövzusunda elmi-praktiki konfrans keçirilib

18 fevral 2010 08:50 (UTC +04:00)

Bakı. Elnur Məmmədli-APA. Qarabağ Azadlıq Təşkilatının (QAT) təşkilatçılığı ilə AMEA İnsan Haqları İnstitutunda “XX əsrdə ermənilərin azərbaycanlıları qarşı törətdikləri kütləvi cinayətlər” mövzusunda elmi-praktiki konfrans keçirilib. APA-nın məlumatına görə, tədbirdə tarixçi alimlər, ziyalılar iştirak edib. QAT sədri Akif Nağı bu gün Azərbaycanda yaşayan bütün yaşayış məntəqələrinin erməni cinayətlərindən zərər çəkdiyini bildirib. O, işğal altında olan torpaqların sülh yolu ilə azad edilməsinin nəticə vermədiyini qeyd edib: “Biz torpaqları yalnız hərb yolu ilə azad edə bilərik. Buna yalnız hərbi yolla nöqtə qoymaq olar. Ermənistan dövləti Azərbaycanın torpaqlarında yaradılıb və bunu hər kəs bilir”.

A. Nağı bildirib ki, XX əsr ərzində ermənilər tərəfindən törədilən faciələrin hamısının araşdırılmasına ehtiyac var və bununla bağlı əsərlər yazılmalıdır: “Bu gün belə əsərlər yazılır. Amma bunlarda sistemli yanaşma yoxdur. Digər tərəfdən ermənilərin törətdiyi əməllərlə bağlı beynəlxalq hüquq bizə hansı hüquqları verir və biz nə edə bilərik, bu məsələlər aydınlaşmalıdır”. A. Nağı kütləvi qırğınlarla bağlı ermənilərin ifşa olunması üçün atılacaq addımların müəyyənləşməsini də vacib sayıb.

Tarix elmləri namizədi Vaqif Abışov konfransda “XX əsrdə ermənilərin azərbaycanlılara qarşı törətdikləri kütləvi cinayətlərin tarixinə dair”, Milli QHT Forumunun prezidenti Rauf Zeyni “Ermənilərin azərbaycanlılara qarşı törətdiyi soyqırım siyasətinin ifşa edilməsində ictimai təşəbbüslərin rolu”, hüquq elmləri doktoru Kamil Səlimov “Soyqırım məsələsinin hüquqi-siyasi problemləri” və siyasi elmlər namizədi Araz Aslanlı “Azərbaycanlılara qarşı ermənilərin kütləvi cinayətləri və beynəlxalq hüquq” mövzularında məruzə ilə çıxış ediblər.

Məruzələrdən sonra konfransda qətnamə qəbul edilib. Sənəddə ermənilərin Azərbaycanlılara qarşı törətdiyi deportasiyaya görə cavab verməli olduqları, kütləvi qətllərin insanlığa qarşı cinayət kimi dəyərləndirilməsi, bunlarla bağlı beynəlxalq məhkəmələrin obyektiv qərar çıxarması, dünya birliyinin bu məsələyə düzgün siyasi qiymət verməsi və cinayətləri törətmiş ermənilərin cəzalandırılması tələb edilib.