Daxili siyasət

Ana səhifə

Daxili siyasət

Azərbaycan prezidenti yanında müşavirə keçirilib

18 fevral 2010 15:19 (UTC +04:00)

APA-nın məlumatına görə, müşavirədə giriş sözü ilə çıxış edən prezident İ. Əliyev 2010-cu ilin “Ekologiya ili” elan olunduğunu, ölkədə ekoloji problemlərin həllinə böyük diqqət yetirildiyini və bununla bağlı konkret proqramın qəbul edildiyini vurğulayıb.

Dövlət başçısı həmin proqramın müxtəlif sahələri əhatə etdiyini, burada nəzərdə tutulan tədbirlərin icra mexanizmlərinin, vaxtının və maliyyə mənbələrinin də əksini tapdığını bildirib.

Dünyada maliyyə və iqtisadi böhranın davam etməsinə baxmayaraq, Azərbaycanın sosial-iqtisadi sahədə nailiyyətlər qazandığını deyən İ. Əliyev iqtisadi uğurların daha da möhkəmləndirilməsi ilə yanaşı, hazırda ekoloji problemlərə də xüsusi diqqət yetirilməsinin vacibliyini diqqətə çatdırıb. Dövlət başçısı neftlə çirklənmiş ərazilərin təmizlənməsi, içməli su, kanalizasiya, məişət tullantılarının utilizasiyası və s. istiqamətlərdə görülən işlərdən və qarşıda duran vəzifələrdən danışıb.

Ekologiya və təbii sərvətlər naziri Hüseynqulu Bağırov, Bakı Şəhər İcra Hakimiyyətinin başçısı Hacıbala Abutalıbov və Azərbaycan Respublikası Dövlət Neft Şirkətinin prezidenti Rövnəq Abdullayev ekoloji problemlərin həlli ilə bağlı 2010-cu ildə və növbəti illərdə həyata keçirilməsi nəzərdə tutulan layihələr barədə prezidentə ətraflı məlumat veriblər.

Dövlət başçısı Bakı və Abşeron yarımadasında 3 milyondan çox ağacın əkilməsi ilə əlaqədar yaşıllaşdırma tədbirlərində əhalinin yaxından iştirakının əhəmiyyətini vurğulayıb.

Hövsan Aerasiya Stansiyasının istifadəyə verilməsinin paytaxtın kanalizasiya probleminin həllinə önəmli töhfə olduğunu bildirən prezident beynəlxalq təcrübə əsasında kanalizasiya sularının təkrar istifadəsi layihəsinin hazırlanmasının vacibliyini söyləyib. Dövlət başçısı Bakının içməli su ilə təminatının yaxşılaşdırılması məqsədi ilə Oğuz-Qəbələ-Bakı su kəmərinin tikintisinin yaxın zamanlarda başa çatdırılacağını vurğulayıb, bölgələrdə içməli suyun tərkibinin yaxşılaşdırılması üçün quraşdırılan modul qurğuların sayının artırılması və bu layihənin tətbiq edildiyi ərazilərin genişləndirilməsi barədə tapşırıqlar verib. Bakı buxtasının təmizlənməsi tədbirlərinin də həyata keçirilməsi məsələsinə toxunan prezident Xəzər dənizinin suyundan içməli su kimi və suvarma məqsədi ilə istifadə edilməsinin beynəlxalq təcrübəyə uyğun mümkünlüyünü də diqqətə çatdırıb.

Dövlət başçısı havanın çirkləndirilməsinin qarşısının alınması, meşələrin qorunması, Abşeron yarımadasındakı göllərin bəzilərinin qurudulması, bir sıra göllərin isə istirahət məkanına çevrilməsi, bərpa olunan enerji mənbələri üzrə layihələr və s. məsələlərlə əlaqədar fikirlərini bildirib, müzakirə edilən bütün mövzulara dair kompleks layihələr və təkliflərin hazırlanmasını tapşırıb.

ekologiya_il