Daxili siyasət

Ana səhifə

Daxili siyasət

İsa Qəmbər Lalə Şövkətə xəbərdarlıq mesajı göndərib

19 fevral 2010 13:57 (UTC +04:00)

Bakı-APA. Liberal Partiyanın lideri Lalə Şövkət Hacıyeva müxalifətin birliyi mövzusunda APA-ya açıqlamalar verərkən Müsavat başqanı İsa Qəmbərin ona düşmən mövqeyində olduğunu bəyan edib. Lalə Şövkət deyib ki, bu gün Müsavat Partiyasının başqanı şəxsən ona qarşı düşmənçilik mövqeyindən çıxış edir. Belə bir məqamda əgər müxalifətin ümumi birliyi olmasa, Liberal Partiyası Müsavatla hansısa məhdud bir birlikdə ola bilməz: “Tərəfimdən bu məsələyə nöqtə qoyulub. Çünki düşmənçilik olan yerdə əməkdaşlıq mümkün deyil”. Lalə Şövkət hələ yanvarın əvvəlində mətbuatda məqalə ilə çıxış edərək bütün müxalifətin birliyini, parlament seçkilərinə vahid siyahı ilə getməsini təklif etdiyini bildirib.

“Bu təklifdən sonra isə hamı gördü ki, mənə qarşı hansı müharibələr elan olundu. Bu məsələlər ”Azadlıq" blokunda müzakirə olunacaq. Qərar qəbul olunandan sonra biz öz mövqeyimizi bildirəcəyik. Hər halda, mənim təklifim müxalifətin bütün birliyi idi. Bu vahid siyahıda görkəmli ziyalılarımız, ictimai xadimlər, gənclər və jurnalistlərin təmsil olunmasını istəyirdim".
Lalə Şövkət deyib ki, düşmənçilik olan yerdə birlik mümkün deyil və belə şəraitdə yaranan birliyin də uğuru ola bilməz: “Ona görə ki, düşmənlə yol gedə bilməzsən”.
Bəs, İsa Qəmbər Lalə Şövkəti düşmən kimi görürmü və ona düşmənçilik mövqeyindədirmi?
Bu sualla müraciət etdiyimiz Müsavat başqanı Lalə Şövkətin açıqlamasını təəccüblə qarşıladığını bildirdi: “Guya Müsavat başqanı Lalə Şövkətə savaş elan edib. İstənilən jurnalistə təklif edirəm ki, bir vərəqi iki hissəyə bölün, bir hissəsində mənim Lalə Şövkət haqqında indiyə qədər dediklərimi yazın, ikinci hissəsində isə Lalə Şövkətin bu günəcən mənin haqqımda dediyi sözləri. Mən əminəm ki, birinci hissəyə nəsə yazmağa çətinlik çəkəcəksiniz. Çünki mənim yadıma gəlmir ki, Lalə Şövkət haqqında nə isə demişəm. Ancaq ikinci hissədə yer çatmayacaq və başqa kağızlar götürməyə məcbur olacaqsınız. İstəyir son bir ay üçün, istərsə də son 20 il üçün belə bir araşdırmanın aparılmasını təklif edirəm. Faktiki olaraq bu gün Lalə Şövkət, ona yaxın olan siyasi çevrələr, onların nəzarətində olan bütün informasiya vasitələri mənə müharibə elan ediblər. Mən də çox maraqla bu prosesi izləyirəm. Bu adamların məqsədlərini, maraqlarını, niyyətlərini araşdırmaq və başa düşmək istəyirəm. Hələ ki, mən heç nə deməmişəm”.
Lalə Şövkətin bütün müxalifətin birliyini təklif etdiyi və bundan sonra ona qarşı müharibə elan olunduğu haqda fikirlərinə isə İsa Qəmbər belə münasibət bildirdi: “Mən istərdim ki, Lalə Şövkət bütün müxalifət dedikdə hansı partiyaları nəzərdə tutduğunu da açıqlasın. Aydın olsun ki, hansı partiyalar bu əməkdaşlığa daxil olacaqsa, Lalə Şövkət hesab edəcək ki, bütün müxalifət bir yerdədir. Bu, mənim üçün çox maraqlıdır”.