Daxili siyasət

Ana səhifə

Daxili siyasət

Səfa Mirzəyev: “Azərbaycan İKT üzvü olan ölkələrin parlamentlərində Xocalı faciəsinin müzakirəyə çıxarılmasını və soyqırımı kimi tanınmasını tələb edə bilər”

23 fevral 2010 10:19 (UTC +04:00)

Bakı. Elbrus Seyfullayev - APA. Milli Məclisin bugünkü iclasında cari məsələlərin müzakirəsi zamanı deputatlar bir sıra təkliflər irəli sürüblər. APA-nın xəbərinə görə, deputat Musa Quliyev 1948-1953-cü illərdə azərbaycanlıların Ermənistandan kütləvi şəkildə repressiya olunması ilə bağlı məsələnin Milli Məclisdə müzakirəsini təklif edib. Onun sözlərinə görə, bu repressiya faktına görə Ermənistandan kompensasiya tələb olunmalıdır.

Deputat Aynur Quliyeva Musa Quliyevin fikrini dəstəkləyib. O, həmçinin Xocalı soyqırımının dünyada tanıdılması istiqamətində tədbirlərin intensivləşdirilməsini təklif edib.

Qüdrət Həsənquliyev spikerin başçılığı ilə İrandan səfərdən qayıdan nümayəndə heyətinin keçirdiyi görüşlər haqqında məlumat verilməsini istəyib. Millət vəkili İranda Azərbaycana qarşı aksiya keçirildiyini və təhqirlərə yol verildiyini deyib: “Xocalı soyqırımın törədilməsində iştirak edən Ermənistan prezidentinin hansı haqla İranda əlini sıxırlar? Biz sizə səs verib spiker seçmişiksə, İrana səfəriniz haqqında niyə məlumat vermirsiniz?”

Spiker Oqtay Əsədov deputatın sözlərinə cavab olaraq onun çıxışında ehtiyatlı olmasını istəyib: “Mən çıxış etmişəm, edirəm də. Səfər haqqında da lazımi məlumat veriləcək. İran-Azərbaycan münasibətlərində fərqli yanaşmalar var. Bir var populist yanaşma, bir də var dövlətçilik yanaşması... Biz İranla münasibətlərimizi hər zaman yüksək səviyyədə qurmalıyıq. Əfsus ki, həm o tərəf, həm də bu tərəfdə bu əlaqələrə mane olanlar var”.

Mübariz Qurbanlı Türkiyənin Ermənistanla imzaladığı protokollarla bağlı qətiyyətli mövqe ortaya qoyduğunu deyib. Onun sözlərinə görə, hazırda Türkiyəyə qarşı təzyiqlər artmaqdadır: “ABŞ Konqresində qondarma “erməni soyqırımı” layihəsi müzakirəyə çıxarılacaq. Bu, Azərbaycanın da maraqlarına ziddir. Azərbaycan parlamenti bu məsələnin yenidən gündəmə gətirilməsinə etiraz məktubu ünvanlamalıdır. Mümkün olsa, Azərbaycan parlamenti bununla bağlı ABŞ-a məxsusi deputat qrupu da göndərməlidir”.

Məlahət İbrahimqızı M. Qurbanlının təkliflərini dəstəkləyib, ABŞ Konqresinə müraciət edilməsinin zəruriliyini vurğulayıb.

Millət vəkili, həmçinin qızların təhsildən yayınması və erkən nikaha daxil olması ilə bağlı ciddi narahatlığa səbəb olan faktların mövcud olduğunu deyib: “Ailə Məcəlləsində qızların aşağı nikah yaşı 17 götürülür. Beynəlxalq sənədlərdə isə bu yaş həddi 18-dir. Azərbaycanda isə istisna hal kimi hətta 16 yaşa icazə verilir. Məncə, bu yolverilməzdir”.

Elman Məmmədov Xocalı soyqırımının tanıdılması istiqamətində Heydər Əliyev Fondunun çox uğurlu fəaliyyət göstərdiyini, bu işlərin gücləndirilməsinin vacibliyini qeyd edib: “Türkiyə birmənalı olaraq bəyan etməlidir ki, ABŞ Konqresi qondarma soyqırımını müzakirəyə çıxaracaqsa, onlar da avtomatik Xocalı soyqırımını tanıyacaqlar”.

Spiker Oqtay Əsədov da Xocalı soyqırımı haqqında danışıb. O, bu illər ərzində faciə ilə bağlı 75 müraciət, qətnamə və qərarın qəbul olunduğunu bildirib: “Xocalı faciəsinə ilk dəfə olaraq İslam Konferansı Təşkilatı tərəfindən düzgün qiymət verildi, faciə ilk dəfə insanlığa qarşı cinayət kimi tanınıb. Biz işimizi bu sənədə uyğun qura bilərik”.

Sonra İKT tərəfindən qəbul edilən sənəd haqqında Milli Məclis Aparatının rəhbəri Səfa Mirzəyev məlumat verib. Onun sözlərinə görə, İKT Gənclər Forumunun Mədəniyyətlərarası Dialoq üzrə baş koordinatoru Leyla Əliyevanın bu istiqamətdə xidmətləri böyük olub: “İlk dəfədir, dünyanın 56 ölkəsini birləşdirilən beynəlxalq təşkilat Xocalı soyqırımına qətliam kimi qiymət verib və bu faciə insanlığa qarşı cinayət kimi tanınıb. Bu ifadə genosidi əks etdirən anlayışdır. Bu bizim əlimizə president verir. Bu qətnaməyə istinadən başqa təşkilatlar tərəfindən də Xocalıya düzgün qiymət verilməsini, eyni zamanda İKT üzvü olan ölkələrin parlamentlərində məsələnin müzakirəyə çıxarılmasını və tanınmasını tələb edə bilərik”.