Daxili siyasət

Ana səhifə

Daxili siyasət

Arif Hacılı: “Əli Kərimlinin İctimai Palatanın sessiyasında bu cür moderatorluğu məni təəccübləndirdi” - MÜSAHİBƏ

Arif Hacılı: “Əli Kərimlinin İctimai Palatanın sessiyasında bu cür moderatorluğu məni təəccübləndirdi” - <font color=red>MÜSAHİBƏ</font>

02 mart 2011 09:23 (UTC +04:00)

Bakı. Pərvin Abbasov-APA. Müsavat Partiyası Mərkəzi İcra Aparatının rəhbəri, partiya başqanının müavini Arif Hacılının APA-ya müsahibəsi

- İctimai Palatanın fevralın 26-da keçirilən iclasında Koordinasiya Şurasının tərkibinin genişləndirilməsinə etiraz etmisiniz. Daha çox Koordinasiya Şurasının tərkibinin genişləndirilməsinə, yoxsa Şuraya üzv olunan şəxslərə etiraz edirdiniz?

- İlk növbədə, qərarların qəbul olunması mexanizmlərinin yanlışlığına etiraz etdim. Çünki əgər hansısa şəxs harasa seçilirsə, səs verənlər bu şəxsin kimliyi barədə məlumatlı olmalıdır. İnsanlar öz namizədliklərini irəli sürməli, digər namizədlərin lehinə, yaxud əleyhinə təbliğat aparmaq imkanı əldə etməlidir. Ancaq İctimai Palatanın iclasında bu məsələlər bir sürpriz kimi təqdim olundu. Əslində İctimai Palatanın üzvlərinin rəyi öyrənilmədi ki, ümumiyyətlə tərkibin genişləndirilməsinə ehtiyac var, yoxsa yox? Şuranın tərkibi genişləndirilirsə, hansı tərkibdə genişləndirilməlidir? Şura genişləndirilirsə, hansı sayda genişləndirilməlidir? Hansı kriterilər və prinsiplər əsasında genişləndirilməlidir? Bu məsələlər İctimai Palatada deyil, Koordinasiya Şurasında müzakirə olunmuşdu, ona görə də mən bu məsələlərin İctimai Palatanın növbəti iclasına qədər təxirə salınmasını, bu məsələlərin həmin vaxta qədər müzakirə olunmasını təklif etdim. Təəssüf ki, mənim proseduralara və ümumi demokratik prinsiplərə uyğun təklifim qəbul olunmadı.

- Bəs Rauf Arifoğlu, Şahvələd Çobanoğlu, Mehriban Vəzirin Koordinasiya Şurasına üzv qəbul olunması ilə bağlı hər hansı narazaılığınız varmı?

- Bu məsələni fərdiləşdirmə istəməzdim. Ancaq hesab edirəm ki, istənilən halda əgər kimlərsə harasa seçilirsə, səs verən adamların bu insanları seçmə hüququ olmalıdır. Mən bilirəm ki, İctimai Palata üzvlərinin çoxu özləri də namizəd kimi iştirak etmək istəyirdilər. Ancaq onlara belə bir imkan yaradılmadı və bütövlükdə Koordinasiya Şurasının tərkibi ümumi İctimai Palatanın hər bir üzvü tərəfindən yox, Koordinasiya Şurasına daxil olan ayrı-ayrı adamlar tərəfindən müəyyənləşdirildi ki, bu da yanlış idarəçilik sistemidir. Təcrübə göstərir ki, bu cür idarəçilik sistemi yekunda təşkilati böhrana aparır.

- Siz bu məsələdə Koordinasiya Şurasının hansı üzvünü, yaxud üzvlərini günahlandırırsınız?

- Konkret kimisə günahlandırmaq istəməzdim. Ancaq hesab edirəm ki, Koordinasiya Şurasının üzvləri öz üzərlərinə düşən məsələlərə daha məsuliyyətlə yanaşmalıdırlar. Mən bilirəm ki, İctimai Palata üzvlərinin böyük bir qismi prosesin bu şəkildə aparılmasından narazı qalır.

- Bununla bağlı hansı addımları atmaq fikriniz var?

- Mən bu məsələ ilə bağlı mövqeyimi ictimailəşdirmişəm və bu mövqeyimi Koordinasiya Şurasının üzvlərinin diqqətinə çatdırmışam. Hesab edirəm ki, İctimai Palatanın üzvlərinin müzakirəsindən keçmədən Şuranın tərkibinin belə genişləndirilməsi, eyni zamanda toplantıda iştirak etməyən, özlərini təqdim etməyən, onlara səs verən insanların suallarına cavab verməyən adamların Koordinasiya Şurasına seçilməsi ciddi bir səhv idi. Düşünürəm ki, bu məsələlər barədə mənim fikirlərim Koordinasiya Şurası üzvlərinin bundan sonra öz vəzifələrinə daha məsuliyyətlə yanaşmasına səbəb olacaq. Mənə İctimai Palatanın onlarla üzvü müraciət edərək Koordinasiya Şurasına üzv edilən şəxslərin bəzilərinin kim olduğu barədə suallar verirlər. Ancaq əslində yeni üzvlər həmin sual verən şəxslər tərəfindən seçilmiş adamlar sayılır. Bu cür davranış yolverilməzdir. Bütövlükdə bu məsələlərlə bağlı müəyyən fikirlərim var və demokratik prinsiplərə, prosedura qaydalarına tam şəkildə əməl olunması üçün bundan sonra da fəaliyyət göstərmək, ciddi addımlar atmaq fikrindəyəm.

- Necə hesab edirsiniz, İctimai Palatanın sonuncu sessiyasına AXCP sədri Əli Kərimli deyil, Koordinasiya Şurasının üzvlərindən başqa birisi sədrlik etsəydi, proses necə davam edəcəkdi?

- Hər halda Əli Kərimli kimi təcrübəli bir siyasətçinin bu cür moderatorluğu məni təəccübləndirdi. Eyni zamanda, bilirəm ki, yeni üzvlərin qəbulu məsələsi Koordinasiya Şurasının iclasında müzakirə olunub, Palatanın iclasında deyildi ki, bu məsələ guya konsensusla həll edilib. Ancaq İctimai Palatanın iclasının keçirildiyi gün Koordinasiya Şurasına daxil olan iki şəxsin məsələlərin bu cür həll edilməsinin düzgün olmadığı barədə fikirlərini şəxsən eşitmişdim.

- İctimai Palatanın iclasında mitinqlə bağlı da fikir ayrılığı oldu. Ən diqqətçəkən isə Müsavat və AXCP təmsilçilərinin fikirlərinin fərqliliyi idi.

- Məsələnin bu dərəcədə sadələşdirilməsinin tərəfdarı deyiləm. Görünür, AXCP-nin müəyyən qurumlarında bu məsələ əvvəlcədən müzakirə olunmuşdu və həmin toplantıda bu mövqe açıqlandı. Onu da qeyd etmək istəyirəm ki, AXCP üzvü olan İctimai Palata üzvlərinin heç də hamısı 12 martda mitinq keçirilməsinin əleyhinə çıxış etmədi. Çıxış edən AXCP üzvlərindən ən azı iki nəfəri mənim təklifimi müdafiə etdi. Bu da bir daha onu təsdiq edir ki, mitinqlə bağlı əks arqumentlərin gətirilməsində Müsavatın mövqeyinə qərəzli mövqe qoyulmayıb.

- Müsavat Partiyasının İctimai Palatadan kənar mitinq təyin etməsini nə ilə izah edərdiniz?

- Əslində biz İctimai Palatadan kənar mitinq təyin etməmişik. Sadəcə olaraq martın 12-də mitinq keçirilməsinin məqsədəuyğun olması və bu məsələ ilə əlaqədar olaraq siyasi tərəfdaşlarla məsləhətləşmələr aparılması qərarını vermişik. Biz çalışacağıq ki, intensiv müzakirələr apararaq təkcə Müsavat Partiyası tərəfindən yox, Azərbaycanın aparıcı ictimai-siyasi təşkilatlarının, imkan olsa İctimai Palatanın qərarı ilə mitinqin təyin olmasına nail olaq. Məqsədimiz bundan ibarətdir.

- Artıq bir müddətdir mətbuatda AXCP ilə Müsavat Partiyasının birləşməsi ilə bağlı mövzulara toxunulmur. Bu məsələ nə yerdədir?

- Mənə elə gəlir ki, bu məsələlərlə əlaqədar AXCP-nin də, Müsavat Partiyasının da mövqeyi kifayət qədər açıq şəkildə ortalığa qoyulub və ən azı bu gün bu mövzu aktual deyil.

- Müsavat Partiyasının növbəti qurultayına hazırlıq işləri nə yerdədir?

- Qurultaya hazırlıq işləri sürətlə davam edir. Artıq iki təşkilat – Naxçıvan şəhər və Binəqədi təşkilatları öz toplantılarını keçirərək qurultaya nümayəndələrini seçiblər. Mart ayında Müsavat Partiyasının əksər rayon təşkilatları konfranslar keçirərək qurultaya nümayəndələrini seçəcəklər. Çalışacağıq ki, bu proses aprel ayında başa çatsın. Müsavat Partiyasının qurultayının təxminən aprel-iyun ayında keçirilməsi nəzərdə tutulub. Bunun üçün nəzərdə tutulan digər işlər də aparılır. Hesab edirəm ki, Müsavatın qurultayı həmişə olduğu kimi kifayət qədər yüksək səviyyədə və mütəşəkkil olaraq keçiriləcək.

- Müsavat Partiyasının başqanlığına namizədliyinizi irəli sürmək fikriniz varmı?

- Mən bu məsələ ilə bağlı həm Müsavat Partiyasının üzvləri və partiyanın rəhbərliyinə daxil olan şəxslərlə, eyni zamanda Müsavatın başqanı ilə məsləhətləşmələr aparıram. Bu məsləhətləşmələr yekunlaşdıqdan sonra bu barədə qərarımı ictimaiyyətə açıqlayacağam.

- Müsavat Partiyasında Sizdən başqa analoji məsləhətləşmələr aparan varmı?

- Məndə belə bir məlumat yoxdur. Ancaq Müsavat Partiyasının hər bir üzvünün Müsavat başqalığına namizədliyini irəli sürmək səlahiyyəti var və heç kim heç kəsin əlindən bu səlahiyyəti ala bilməz.