Daxili siyasət

Ana səhifə

Daxili siyasət

Hacı Allahşükür Paşazadə: “Azərbaycandan gedən bir qrup hacının vətənə dönməsində yaranmış problemin şişirdilməsi təxribatdır”

15 yanvar 2007 14:34 (UTC +04:00)

- Ümumilikdə builki Həcc ziyarətini necə qiymətləndirirsiniz?
- Əgər ötən il ziyarət zamanı Azərbaycandan 5-6 nəfər dünyasını dəyişmişdisə, bu il bu hadisə baş vermədi. Bu il dünyasını dəyişən bir nəfər sırf maşın vurması nəticəsində ölüb. El-obana sağ-salamat qayıtmaqdan böyük xoşbəxtlik yoxdur. Əlbəttə, fikirləşirəm ki, gələn ildən biz Həcc məsələsində xüsusi bir dəyişiklik etməliyik. Hətta təyyarə reyslərinin həyata keçirilməsi ilə bağlı dəyişiklik olacaq. Danışıqlar indi də gedir. Bundan başqa, orada otellərin tutulması ilə bağlı məsələdə çətinliklərimiz var. Çox vaxt otelləri birinci əldən ala bilmirik. Otel kirayələmək üçün əvvəlcədən vəsait qoyulmalıdır. Hər il ötən ilə nisbətən vəziyyət daha da yaxşılaşır.
- Həcc ziyarətinə təyyarə ilə gedən bir qrup azərbaycanlının vətənə dönməsində yaranan problemlər nə ilə bağlıdır?
- Bu il Həcc ziyarətinin qiymətinin nisbətən artmasından istifadə edən bir qrup adam belə məsələləri süni şəkildə şişirtdi. Məsələ ondadır ki, Həcc ziyarətindən qayıdan zaman Səudiyyə Ərəbistanı Krallığında təyyarələrin bəzilərində nasazlıq aşkar olundu. Azərbaycanlı hacıları vətənə gətirəcək təyyarə gecikdi, bunun da nəticəsində bir neçə gün yubanma oldu. Allah eləməsin, birdən təyyarədəki bu nasazlıq havaya qalxandan sonra baş verəydi, onda nə olacaqdı? Bu il bizim ən böyük uğurumuz o oldu ki, ziyarət zamanı rəhmətə gedənimiz olmadı. Bir nəfər dünyasının dəyişdi ki, onu da öz ehtiyatsızlığı üzündən avtomobil vurmuşdu. Biz həmin adamı orada dəfn etdik. Qaldı ölkəyə qayıtmasında problem yaranan şəxslərə, onlara otellər və yemək təklif olunub, lakin imtina ediblər. Deyiblər ki, şeyx onları aldadır, adamlar arasında əks-təbliğat aparıblar. Bizim Səudiyyə Ərəbistanı Krallığındakı səfirliyin müşaviri Oqtay Qurbanov da orada olub və onlara otellərdə yerləşməyi təklif edib. Bu dəfə də onlar bundan imtina ediblər. Səfirin müşaviri onlardan soruşub ki, bu narahatçılığı yaratmalarının səbəbi nədir? Cavab veriblər ki, bilə-bilə belə edirlər. Deyiblər ki, pulları da var, hər şeyləri də...
- Dediklərinizdən belə çıxır ki, vəziyyətin gərginləşdirilməsi təxribat xarakteri daşıyıb?
- Bəli, bu təxribatdır. Ölkədə də bəzi adamlar deyirlər ki, çıxsınlar mitinqə, narazılıqlarını bildirsinlər. Xüsusilə qiymət artımından sui-istifadə etmək istəyənlər var. Mən demirəm ki, çətinlik olmayıb. Bəli, bu baş verib. Mənim özümün də günlərlə bu çətinliyi yaşayıb, hava limanlarında qaldığım vaxt olub. Onlar orada iki gün yatmayıblarsa, biz də burada yatmamışıq. Yenə də deyirəm, bu hadisədir. 3 milyon insan Həccə gedib. Hər şeyin baş verməsi mümkündür. Bəlkə də bu, Allahın imtahanıdır. Amma bunu başqa formada qələmə vermək, xalqı təşviş içində saxlamaq ki, guya orada dilənçilik edirlər, bu düzgün deyil. Mən bu sözləri özümdən demirəm. Oraya göndərdiyim müavinim, Hacı Salman Musayev və səfirliyin müşaviri bu barədə mənə xəbər verib. Dünən artıq həmin hacılar yola salınıb və artıq vətənə qayıdıblar. Amma onlar yola salınanda yenə də qarışıqlıq düşüb, hacıların bir hissəsinin əşyaları Düşənbəyə gedib, yarısı isə Ciddədə qalıb. İndi çalışırıq ki, bu məsələni həll edək. Mən bütün bu çətinlikləri başa düşürəm. Düşənbədə qar yağdığından Tacikistanda günlərlə təyyarə havaya qalxa bilmirdi. Biz onların təyyarələri ilə müqavilə bağlamışdıq. Hacıların Ciddə-Tehran reysi ilə İrana, oradan isə Bakıya gəlməsi üçün hətta Əli Əkbər Haşimi Rəfsəncani ilə danışdım. Halbuki bizim proqramımızda onların qayıtması yanvarın 18-ə qədər nəzərdə tutulub.
- Belə məlumatlar var ki, problemlə üzləşən hacılar Sizin rəhbərlik etdiyiniz idarəni məhkəməyə verməyə hazırlaşırlar...
- Məhkəmə verirlərsə, buyursunlar. Qanun-qayda var. Biz üzərimizə düşən vəzifəni yerinə yetirməmişiksə, bu başqa məsələ. Biz hər şeyi etmişik. Problem texniki səbəblərdən baş verib. Azərbaycanın Səudiyyə Ərəbistanı Krallığındakı səfirliyinin də məlumatı var ki, onların vətənə dönüşü niyə gecikib.
- Bəziləri məsələni belə şərh edirlər ki, Qafqaz Müsəlmanları İdarəsi Həcc ziyarətini monopoliyasında saxlamaq üçün bu problemi bilərəkdən yaradır.
- Həcc ziyarətini təşkil etmək mənim səlahiyyətimdə olan məsələdir və bunu mənim əlimdən heç kəs ala bilməz, mən Şeyxəm. Qaldı ziyarəti yüksək səviyyədə keçirməklə bağlı məsələyə, bu mənim borcumdur. Bunu məndən tələb edə bilərlər. Bu il səhvimiz olubsa, gələn il onun aradan qaldırılmasına çalışarıq. Məhkəməyə müraciət etmək isə onların öz işdir. Kimsə ölkə daxilində dini-mənəvi dəyərləri gözdən salmağa çalışırsa, buna dəyməz. Allah yolunda Həccə gedən, gərək haqqı da bilsin. /APA/