Daxili siyasət

Ana səhifə

Daxili siyasət

Vəkil İkram Şirinov: “Apellyasiya Məhkəməsində Ramil Səfərovun işinə obyektiv baxılmasına ümidlər çoxdur”

22 yanvar 2007 11:15 (UTC +04:00)

Bu barədə APA-ya açıqlamasında Macarıstana səfərdən qayıtmış zabitin vəkili İkram Şirinov məlumat verib. Vəkil bildirib ki, R. Səfərov Apellyasiya Məhkəməsində işə baxılmasında azərbaycanlı vəkillərin prosesdə iştirakına icazə verilməsinə dair məhkəməyə müraciət etmişdi: “Biz orada olarkən məlum oldu ki, Apellyasiya Məhkəməsi tərəfindən Ramil Səfərovun vəsatəti təmin olunub və azərbaycanlı vəkillərin də apellyasiya şikayətinə baxılması mərhələsində məhkəmədə iştirakına rəsmən icazə verilib”.
İ. Şirinovun sözlərinə görə, Macarıstana səfəri zamanı Ramil Səfərovla və onun macar vəkilləri (həm ölüm, həm də mühafizəçilərlə bağlı cinayət işlərində onun hüquqlarını müdafiə edən vəkillər) görüşüblər. Hər iki görüşdə Vəkillər Kollegiyasının sədri Azər Tağıyev də iştirak edib. Görüşdə qəbul edilmiş məhkəmə hökmləri və onlardan verilən apellyasiya şikayətlərinə baxılması ilə bağlı məsələlər ətraflı müzakirə edilib: “Ramil Səfərovla istintaq təcridxanasının mühafizəçiləri arasında yaranmış insidentlə bağlı cinayət işi üzrə məhkəmənin hökmü hələlik rəsmi tərtib olunmayıb və ona təqdim olunmayıb. Macar qanunvericiliyinə görə, bu, iki-üç ay davam edə bilər. İş yükü ilə əlaqədar bir qədər də ləngiyə bilər. Ramil Səfərovun macar vəkilinin dediyinə görə, həmin hökmdən həm prokurorluq , həm də müdafiə tərəfi hökm elan olunarkən şifahi apellyasiya şikayəti verəcəklərini bəyan ediblər. Rəsmi apellyasiya şikayəti hökm əldə edildikdən sonra təqdim ediləcək. İşin baxılması iyun, hətta ola bilsin ki, sentyabr ayında baş tutsun”. R. Səfərovla səfər ərzində iki dəfə görüşdüklərini diqqətə çatdıran vəkilin sözlərinə görə, onun durumu və saxlanma şəraiti olduqca yaxşıdır, əhval-ruhiyyəsi yüksəkdir, özünü çox yaxşı hiss edir: “Orada ona olan münasibət də olduqca yaxşıdır. Özü cinayət işinin materialları, məhkəmə iclasının protokolları ilə tanış olub və 38 səhifəlik qeydlər aparıb. Həmin qeydlər əsasında biz apellyasiya şikayətinə əlavə hazırlamağı planlaşdırırıq. R. Səfərovla Apellyasiya Məhkəməsində işə baxılması ilə bağlı müdafiənin təşkili məsələlərini müzakirə etmişik. Həmin məsələlər macar vəkillərlə də müzakirə olunub. Bizim və macar vəkilin mövqeyi ondan ibarətdir ki, iş üzrə çıxarılmış məhkəmə hökmü hüquqi baxımından xeyli dərəcədə dayanıqsızdır, subyektiv mülahizələrə əsaslanır, nəinki konkret faktlara. Apellyasiya Məhkəməsində işə obyektiv baxılmasına ümidlər çoxdur”.
İ. Şirinov bildirib ki, ilkin razılaşmaya görə, Macarıstana növbəti səfərləri məhkəmə prosesindən 3-4 gün öncə baş tutacaq. Lakin vəkil bu müddətə qədər növbəti səfərin olacağı da istisna etmir. Qeyd edək ki, R. Səfərovun ailəsinin və Müdafiə Nazirliyinin nümayəndəsi qismində İ. Şirinovla bərabər vəkil Elmar Kərimov da iştirak edir. İ. Şirinovun sözlərinə görə, E. Kərimov səhhətindəki problemlə bağlı bu dəfə Macarıstana gedə bilməyib: “Ola bilsin ki, növbəti səfərlərdə o da iştirak etsin. Elmar Kərimova Ramil Səfərovla görüşünə və məhkəmə prosesində iştirakına icazə verilməsinə dair məhkəmənin rəsmi bildirişi var”. Xatırladaq ki, ölüm işində R. Səfərovun hüquqlarını macar vəkil Georq Macar, nəzarətçilərlə bağlı işdə isə vəkil Klara Fişer müdafiə edir./APA/