Daxili siyasət

Ana səhifə

Daxili siyasət

Azərbaycan prezidenti Davos Forumunda “Neft geosiyasətinin artan əhəmiyyəti” mövzusundakı iclasda çıxış edib

25 yanvar 2007 15:25 (UTC +04:00)

APA-nın Azərtac Dövlət Agentliyinə istinadən verdiyi məlumata görə, prezident İlham Əliyev iclasda iştirak edib. İclası Dünya İqtisadi Forumunun icraçı direktoru Klaus Şvab açıb. Açılış nitqi söyləyən icraçı direktoru tədbirdə iştirak edənlərə təşəkkürünü bildirib.
Azərbaycan prezidenti İlham Əliyev isə çıxışı zamanı Azərbaycanda qlobal enerji layihələrinin həyata keçirildiyini vurğulayıb, bunun bütün dünya üçün əhəmiyyətli olduğunu bildirib. Prezident enerji təhlükəsizliyi məsələsində Azərbaycanın rolunun günbəgün artdığını söyləyərək, energetika sahəsində əldə olunan uğurlardan, bütövlükdə Azərbaycanın iqtisadi potensialından danışıb. Daha sonra ABŞ, Rusiya, Böyük Britaniya, Kanada, Fransa, Almaniya, İsveç, İsveçrə, Finlandiya, Braziliya, Malayziya, Niderland, Səudiyyə Ərəbistanı, Koreya Respublikası, Norveç, Çin, Küveyt, Qazaxıstan, Belçikanı təmsil edən nümayəndə heyətlərinin rəhbərləri çıxış ediblər. Söhbət əsasən neft-qaz ölkəsi kimi tanınan ölkələrdəki iqtisadi inkişafdan söhbət açıblar.
Çıxışlarda neft-qaz ixracatçısına çevrilən Azərbaycanın Avropanın enerji təhlükəsizliyi sahəsində gördüyü işlər yüksək qiymətləndirilib, ölkəmizdə bu istiqamətdə aparılan siyasətin uğurlu və uzaqgörən olduğu xüsusi vurğulanıb.
İclasda həmçinin neft sənayesinin son 100 illik tarixi, enerji daşıyıcılarının dünya bazarlarına çatdırılması, bazar rejimi və sərmayə qoyuluşları çərçivəsində geosiyasi vəziyyətin dinamikasının dəyişilməsindən danışılıb. Dünyada baş verən iqlim dəyişikliyi və neft hasilatının yüksək həddə çatması, qlobal enerji təhlükəsizliyi kimi məsələlərdən bəhs edilib, bu baxımdan beynəlxalq əlaqələrin ön plana çıxarılmasının zəruriliyi xüsusi vurğulanıb. Müzakirələr zamanı beynəlxalq enerji sektorunda hazırkı geosiyasi vəziyyətin idarə olunması üçün sərmayəçilərin üzərinə düşən mühüm vəzifələrdən, ayrı-ayrı regionlarda enerji sektorunun milliləşdirilməsi və Avropa İttifaqının bu sahədə təhlükəsizlik tədbirlərinin həyata keçirilməsi və gücləndirilməsi baxımından görəcəyi işlərdən də geniş söhbət açılıb. /APA/