Daxili siyasət

Ana səhifə

Daxili siyasət

Dövlət Qulluğu Məsələləri üzrə Komissiya müxtəlif nazirlik və komitələrdə 80-ə yaxın vakant yerin tutulması üçün müsabiqə elan edib

06 mart 2007 11:48 (UTC +04:00)

APA-nın məlumatına görə, tədbirdə komissiyanın fəaliyyəti və dövlət qulluğuna qəbulla bağlı məlumat verilib. B. Xəlilov bildirib ki, dövlət qulluğunda vakant vəzifələrə namizədlərin seçilməsi üçün müsabiqə rəhbərlik etdiyi komissiya tərəfindən keçirilir. Onun sözlərinə gərə, hazırda komissiya müxtəlif nazirlik və komitələrdə 80-ə yaxın vakant yerin tutulması üçün müsabiqə elan edib. İndiyə qədər belə müsabiqələrlə bağlı elanlar verilmədiyini bildirən B. Xəlilov deyib ki, bu cür elanlar açıq olacaq. Müsabiqədə iştirak etmək istəyənlər sənədlərini elan dərc olunandan 30 gün müddətində komissiyaya təqdim edə bilərlər. Sənədlər komissiya tərəfindən yoxlandıqdan sonra namizədlər müsabiqənin ilkin mərhələsi sayılan test imtahanına buraxılacaqlar. Test imtahanı Tələbə Qəbulu üzrə Dövlət Komissiyası, müsabiqə isə vakant dövlət qulluğu vəzifələri olan müvafiq dövlət orqanları ilə birgə keçiriləcək. Komissiya sədri vurğulayıb ki, müsabiqədə vətəndaşların biliklərinin əsas götürüləcəyinə zəmanət verirlər: “Vətəndaşların, ictimaiyyətin bizə inamı olmalıdır. Keçirdiyimiz tədbirlər şəffaf olacaq, qeyri-qanuni hallara yol verilməyəcək. Bu, testdən sonra keçiriləcək müsabiqəyə də aid olacaq. Biz dövlət qulluğuna ən layiqli, ən bilik Azərbaycan vətəndaşlarını seçirik.
Dövlət qulluğuna qəbulun müsabiqədən kənar həyata keçirilməsi korrupsiyaya şərait yarada bilər”.
Dövlət Qulluğunun İdarəetmə Şurası yanında Korrupsiyaya qarşı Mübarizə Komissiyasının katibi İnam Kərimov qeyd edib ki, 2006-cı il ərzində komissiyaya 200-ə yaxın vətəndaşın müraciəti daxil olub. Onlardan 150-yə yaxını araşdırılmaq üçün dövlət orqanlarına göndərilib. Onun sözlərinə görə, gələcəkdə bu müraciətlərlə bağlı mətbuata açıqlamalar veriləcək.
Qeyd edək ki, sözügedən müsabiqə Sənaye və Energetika Nazirliyi, Qiymətli Kağızlar üzrə Dövlət Komitəsi, Daşınmaz Əmlakın Dövlət Reyestri Xidməti, Prezident yanında Dövlət Qulluğu Məsələləri üzrə Komissiya, Hesablama Palatası, Tələbə Qəbulu üzrə Dövlət Komissiyası, Mədəniyyət və Turizm Nazirliyi, Nəqliyyat Nazirliyi, Dövlət Torpaq və Xəritəçəkmə Komitəsindəki müxtəlif istiqamətlər üzrə olan vakant yerlər üçün elan olunub. /APA/