Daxili siyasət

Ana səhifə

Daxili siyasət

Sərdar Cəlaloğlu: “Azadlıq” blokuna qayıtmaqdan söhbət belə gedə bilməz”

06 mart 2007 14:35 (UTC +04:00)

Bu açıqlamanı APA-ya “Azadlıq” blokunun Sədrlər Şurasının üzvü, Vətəndaş və İnkişaf Partiyasının sədri Əli Əliyev bildirib. Onun sözlərinə görə, blokun bundan əvvəlki iclaslarında da ADP-nin bu mövqedən çəkinməsi ilə bağlı müzakirələr aparılıb: “Amma o zaman Sərdar Cəlaloğlu siyasi dialoqla bağlı məsələlərin bu şəkildə təqdim olunmasına səbəb kimi yalnız partiya daxilindəki münasibətləri göstərib. Buna görə də blok partiyanın kollegial qurumlarında məsələyə aydınlıq gətirilməsini gözləyirdi. ADP blokun əsas xəttindən fərqli mövqe nümayiş etdirdiyi üçün belə qərar qəbul etdik. Onlar partiya daxilində dialoqla bağlı müzakirələr apararaq, partiyanın fəaliyyətinin blokun Əsasnaməsinə uyğunlaşmasına çalışmalıdırlar”. Ə. Əliyev hesab edir ki, yalnız ADP siyasi dialoqla bağlı israrlı təkliflərindən əl çəkəcəyi təqdirdə blokda fəaliyyəti bərpa oluna, Sədrlər Şurasının qəbul etdiyi qərar ləğv edilə bilər: “Bu mövqeyi Sərdar Cəlaloğlu da normal qəbul etdi və partiyada müzakirə aparmaq üçün vaxt istədi. Blok siyasi dialoqun yox, bu təklifin birtərəfli qaydada israrlı olaraq çıxış edilməsinə tərəfdar deyil. Hesab edirik ki, belə bir təşəbbüs hakimiyyətdən də gəlməlidir”.
“Azadlıq” blokuna daxil olan AXCP-nin sədri Əli Kərimli isə APA-ya açıqlamasında bu qərarın qəbul olunmasına səbəb kimi ADP-nin daxilində baş verən son proseslərin və partiyanın blokun Əsasnaməsindən kənar fəaliyyətini göstərib. Onun sözlərinə görə, qəbul edilmiş qərarda partiyanın blokdan çıxarılması ilə bağlı səbəblər açıq göstərilib. ADP-nin yenidən bloka qayıtmasının ADP adına iddia edən tərəflərin sonrakı fəaliyyətindən asılı olduğunu vurğulayan Ə. Kərimli bu qərarın hər hansı tərəflə yox, ümumilikdə ADP ilə bağlı olduğunu da qeyd edib. Blokun Rəsul Quliyevlə əməkdaşlıq etməsinin nəzərdə tutulması ilə bağlı suala cavabında AXCP sədri bu barədə hər hansı müzakirənin aparılmadığını bildirib.
ADP-nin bir hissəsinə rəhbərlik edən S. Cəlaloğlu isə APA-ya açıqlamasında qəbul olunan qərarda prokuror ittihamlarına oxşar ifadələrin yer aldığını qeyd edib: “Orada deyilən iradların heç bir əsası yoxdur. ADP blokun qəbul etdiyi prinsiplərin heç birindən kənara çıxmayıb. Sadəcə onları narahat edir ki, nəyə görə ADP-nin Ali Məclisi siyasi dialoqla bağlı qərar qəbul edib. Onların ADP ilə bağlı mövqelərini qəbul etmirəm, bunlar sırf subyektiv fikirlərdir”. Blokun belə qərar qəbul etməsindən təəssüfləndiyini bildirən S. Cəlaloğlu qərarın heç bir əsası olmadığını vurğulayıb: “Bundan sonra blokun iclaslarına qatılmaq fikrim yoxdur və əgər bizim blokdan çıxarılmağımızla bağlı qərar qəbul edillrsə, nə üçün iclaslara qatılmalıyam? Blokun iclaslarına qatılmaqla bağlı təşəbbüs belə göstərməyəcəm. Onlar bu qərarı çox emosional vəziyyətdə qəbul ediblər. Onları daha çox mənim Rəsul Quliyevin məktubunun qəzetdə çapına razılıq verməyim qəzəbləndirib. Mən partiyanın qəbul etdiyi qərarların icrası ilə məşğulam. Özbaşına bir söz deyə bilmərəm. Əgər biz seçdiyimiz yolu düzgün hesab edəcəyiksə, bloka qayatmaqdan söhbət belə gedə bilməz. Çünki onlar bizi bu yolla gedən partiya kimi qəbul etmək istəmirlər”.
Rəsul Quliyevin rəhbərlik etdiyi ADP-nin Qurultaya Hazırlıq üzrə Təşkilat Komitəsinin sədr müavini Akif Şahbazov isə APA-ya açıqlamasında blokun qəbul etdiyi qərarı mənfi qiymətləndirib. Hazırda Təşkilat Komitəsinin iclasının keçirildiyini bildirən A. Şahbazov blokun bu qərarının müzakirə edildiyini bildirib. O müzakirələrdən sonra rəsmi açıqlamanın yayılacağını bildirib.
Müsavat Partiyasının Mərkəzi İcra Aparatının rəhbəri Arif Hacılı isə blokun belə qərar qəbul etməsini gözlənilən hesab edib. Onun fikrincə, “Azadlıq” blokun özünü müxalifət birliyi elan etdiyi üçün müxalifət mövqeyinə uyğun gəlməyən qərarlar qəbul edən partiyanın bu qurumdan uzaqlaşdırmalı idi: “Eyni zamanda blok rəhbərləri Rəsul Quliyevlə Sərdar Cəlaloğlu arasında seçim etmək məcburiyyətində qalmışdılar. Rəsul Quliyev isə blok rəhbərlərinə öz mövqelərinə aydınlıq gətirmək üçün vaxt vermişdi. Hesab edirəm ki, “Azadlıq” bloku Rəsul Quliyevi itirməmək üçün belə bir qərar qəbul etdi”. /APA/