Daxili siyasət

Daxili siyasət

Azərbaycanın fövqəladə hallar naziri Kəmaləddin Heydərov Belarusun baş naziri Sergey Sidorski ilə görüşüb

29 mart 2007 13:13 (UTC +04:00)

Bu gün Azərbaycanın fövqəladə hallar naziri, general-polkovnik Kəmaləddin Heydərov ölkəmizdə rəsmi səfərdə olan Belarusun baş naziri Sergey Sidorski ilə görüşüb. Fövqəladə Hallar Nazirliyinin (FHN) İctimaiyyətlə Əlaqə İdarəsindən APA-ya verilən məlumata görə, K. Heydərov bu səfərin Azərbaycan-Belarus münasibətlərinin dinamik inkişafına müsbət təsir göstərəcəyinə əminliyini ifadə edib. Nazir ötən ilin oktyabrında Azərbaycan prezidenti İlham Əliyevin Belarusa rəsmi səfərindən qısa müddət keçməsinə baxmayaraq, ikitərəfli əlaqələrin daha da genişləndirilməsi istiqamətində artıq konkret nəticələrin əldə olunduğunu vurğulayıb.
S. Sidorski Azərbaycan-Belarus münasibətlərinin bütün səviyyələrdə inkişafı üçün böyük perspektivlərin olduğunu, Azərbaycan prezidentinin Belarusa son rəsmi səfərinin qarşılıqlı əlaqələrin genişlənməsində mühüm rol oynadığını vurğulayıb. İki ölkə arasında əməkdaşlığın sistemli xarakter aldığını söyləyən baş nazir Azərbaycana səfərinin konkret nəticələr verəcəyini qeyd edib. Azərbaycanda yeni yaradılan FHN-in fəaliyyət istiqamətləri ilə maraqlanan qonaq iki ölkənin müvafiq qurumları arasında bu ilin martında imzalanmış 2007-2010-cu illərdə əməkdaşlıq barədə kompleks fəaliyyət planının yaxşı perspektivlər vəd etdiyini bildirib.
Rəhbərlik etdiyi nazirliyin fəaliyyət istiqamətləri haqqında qonağa məlumat verən K. Heydərov iki ölkənin uyğun qurumlarının birgə fəaliyyətinin fövqəladə hallara qarşı mübarizəyə müsbət təsirindən danışıb. O, nazirliyin formalaşmasında belaruslu həmkarlarının da təcrübəsinə müraciət edildiyini qeyd edərək, iki ölkənin müvafiq strukturları arasında əməkdaşlığın davam edəcəyini, bu sahədə tərəfdaşlığın hər iki quruma fayda gətirəcəyini diqqətə çatdırıb.
Görüşdən sonra S. Sidorski və onu müşayiət edən nümayəndə heyəti FHN-in “İzotop” xüsusi kombinatının Radioaktiv tullantıların toplanması, basdırılması, yenidən işlənməsi və saxlanılması mərkəzində olub. Burada fəaliyyət göstərən dozimetriya, spektrometriya, radiokimya, əraziyə dozimetrik nəzarət və digər şöbələrin işi ilə tanış olan qonaqlara son illər ərzində mərkəzdə bir sıra yenidənqurma işlərinin həyata keçirildiyi, burada istifadə edilən cihaz və avadanlıqların bir hissəsinin Belarusdan gətirildiyi barədə məlumat verilib. Belarusun baş naziri mərkəzlə tanışlıqdan razı qaldığını qeyd edərək, burada işlərin yüksək səviyyədə təşkil olunduğunu söyləyib. Öz növbəsində, K. Heydərov bu sahədə işlərin əsasının ümummilli lider Heydər Əliyev tərəfindən qoyulduğunu, bu gün həmin fəaliyyətin prezident İlham Əliyev tərəfindən davam etdirildiyini vurğulayıb. /APA/